Бейсенбі, 12 маусым күні спорт әлеміндегі жылдың ең басты оқиғасы - 2014 FIFA World Cup бастау алады. Бразилияның Сан-Паулу қаласындағы «Арена Коринтианс» стадионында футболдан XX Әлем Чемпионатының ашылу салтанаты өттіі.

«Қазақстан» Ұлттық телеарнасы осымен екінші рет әлемдік деңгейдегі футбол жарыстарын эфирде көрсетіп келеді. Өткен жылы «Қазақстан», «KazSport» және «Еуразия» бірінші арналары бірлесіп Украина мен Польшада өткен футболдан Еуропа Чемпионатын көрсеткен болатын.

«Қазақстан» және «KazSport» телеарналарын біріктіретін «Қазақстан» Ұлттық телерадиокорпорациясы УЕФА (Еуропа Футбол Ассоциацияларының Одағы) тарапынан жоғары бағаға ие болды.

Қазақстан үшін футболдан Әлем Чемпионаты секілді оқиғаның маңызы орасан зор. Биыл отандық комментаторлар мен тілшілер Қазақстан журналистикасы тарихында алғаш рет оқиға болған жерден тікелей эфирге шығу мүмкіндігіне ие болып отыр. Жақын арада, 1 шілдеде тура 1 жылдығын атап өтетін «KazSport» телеарнасы үшін бұл жаман бастама емес.

FIFA World Cup-тың ақтық ойындары 4 жылда 1 рет өткізіліп тұрады. Әлем Чемпионатының аймақтық іріктеу ойындары 3 жылға созылады. Осы жылғы іріктеу жарыстарына 204 команда қатысты. Ал бір ай бойы ақтық ойындар өтетін алдын ала таңдалып алынған елде 32 команда бақ сынайды (іріктеу ойындарының нәтижесі бойынша 31 команда және қабылдаушы елдің құрамасы осындай құқыққа ие болып отыр). Осы жылы қабылдаушы ел - Бразилия, ол өз кезегінде FIFA World Cupтың ең көп рет жеңімпазы атанған еді – 5 рет.

Телекөрермендер «Қазақстан» телеарнасынан тікелей эфирде 33 футбол ойынын тамашалай алады. Ал «Еуразия» бірінші арнасы мен «КAZsport» жарыстың 32 трансляциясын көрермендер назарына ұсынатын болады. Әлем Чемпионатының ашылу салтанатын «Қазақстан» және «КAZsport» арналарынан маусымның 12-сінен 13-іне қараған түні Астана уақыты бойынша 00.15-те тамашалай алады. Ал салтанатты жабылу рәсімін «Қазақстан» және «Еуразия» бірінші арнасы арқылы шілденің 13-інен 14-іне қараған түні Астана уақыты бойынша 01.00-де тамашалауға болады. Ойындардың толық тізбесі «Қазақстан» Ұлттық телерадиокорпорациясының сайтында (www.kaztrk.kz) орналасқан.

Футболдан Әлем Чемпионаты шеңберінде «Қазақстан» Ұлттық телерадиокорпорациясы өзінің телекөрермендері арасында викторина өткізген болатын. Қазақстандықтар футболдан Әлем Чемпионатының тарихына қатысты сұрақтарға дұрыс жауап беру арқылы бағалы және естелік сыйлықтарға ие болу мүмкіндігін пайдаланды.

Абай-ақпарат