Жиегіне желбір түскен әйелдердің тізкиімі Кедендік Одаққа мүше елдерде сатылмайтын болып еді ғой. Мәскеу солай шешкен. Экологиялық тұрғыдан зиянды деген. Енді «Россельхознадзордың» бастығы Сергей Данкверт деген кісі Қазақстан мен Беларуссияға сырттан тасылатын тауарлар тек Ресейдің тексеруінен өтіп барып импортталуы керек деп отыр.

Алайда, Ұлттық экономикамыздың вице-министрі Мәдина Абылқасымова Еуроодақтың құрамындағы елдермен арамыздағы тауар айналымына Ресей кедергі жасай алмайды дегенді айтуда. Шамасы, КО мен Еуразиялық экономикалық одақ деп жүргеніміз осылайша бетті ашып, үнсіз алыстауға алып баратын жол сияқты. Алыстауға алып баратын жол, әрине, жиегін желбір басқан дамбалдың далбаса әңгімесінен емес, осындай күрделі мәселелерден басталуы әбден ықтимал...