Домбырашы Айгүл Үлкенбаева «Жамбыл» фильмінде Дина Нүрпейісованың рөлін сомдайды, деп хабарлайды Baistars.kz.

28 ақпан қазақтың ұлы ақыны Жамбыл Жабаевтың туғанына 170 жыл толуына орай, Қазақстан Ұлттық арнасы «Жамбыл» телехикаясын көрермен назарына ұсынбақшы. Төрт сериялық тарихи драмада жыр алыбының өмір жолы мен шығармашылығы туралы баяндалады.

Фильмнің режиссері «Лавэ», «Меч победы» туындыларымен таныс Әнуар Райбаев, ал сценарийін Бақытжан Шормақов жазған. Фильмде басты рөлді театр мен кино актері Байғали Есенәлиев ойнайды. Ал Дина Нүрпейісованы белгілі күйші Айгүл Үлкенбаева сомдайды, Күләш Байсейітованың рөлінде актриса Айгерім Саменова.

Телехикаяның премьерасы 28 ақпанда Қазақстан ұлттық арнасында болады.

Abai.kz