Пәкістанның сыртқы істер министрлігі Ауғанстан, Пәкістан, Қытай және Құрама Штаттардың өкілдері Кабул мен «Талибан» қозғалысының арасындағы келіссөздерді жалғастыру мәселелерін талқылайтындарын хабарлады.

Министрліктің баспасөз хатшысы Кази Халиулла ақпанның 6-на Исламабадта жоспарланған кездесуде Ауғанстандағы қақтығысты бейбіт жолмен шешу жоспарын келісудің көзделгенін айтты. Бұл соңғы бірнеше апта ішіндегі осындай үшінші кездесу болмақ.

Халиулла осы мәселелерді шешу үшін ел премьер-министрі Наваз Шарифтың жақында Катарға жол жүретінін хабарлады. Дегенмен сапар мақсаты туралы дерек берілмеді.

Пәкістан СІМ мұндай хабарды бірнеше күн бұрын «Талибан» қозғалысы алдағы келіссөздерде өздерінің атынан тек Катардағы «саяси өкілдігі» сөйлей алатынын мәлімдеген соң таратып отыр.

Abai.kz