Кеше, Астана қаласының Конгресс-холл сарайында Тәуелсіздіктің 25 жылдығына, Астана күніне арналған «Бағаналы ордам – басты ордам» атты республикалық ақындар айтысында айтыскер ақын Айбек Қалиев қазақ қоғамындағы ең өзекті мәселелерді жырмен өрнектей келіп, соңғы айлардың бедерінде халықты қатты алаңдатып отырған жер мәселесіндегі Үкіметтің әрекетін өткір сынға алды. Айтыскер ақынның жер туралы жырлағаны залдағы қалың қазақтың көкейіндегісін дөп басып, Айбек ақынның әр сөзіне дуылдата қол соғып отырды.

abai.kz

Айбек Қалиевтің кешегі айтыста жер мәселесіне қатысты айтқаны:

«Болса егер ойлағаның пайда лайым,

Қалайша мұндай жерде жай қалайын?

Шетелге, ей, Үкімет, мені сатшы,

Тілімді енді саған қайрамайын.

Құлдықтың қамытына бой ұсынып,

Қытайға мәңгілікке байланайын.

Ол аз десең әйелім, баламды сат,

Қара бастың бақытын ойламайын.

Жалғыз-ақ өтінішім - қазағымның

Жеріне тимеңдерші, айналайын!»

Abai.kz