Шымкенттің тұрғындары енді тәртіп сақшыларымен Skype арқылы байланыса алады. Қалалық жергілікті полиция мен қала әкімдігі тұрғындармен Skype-конференция өткізеді. Бұл туралы қалалық жергілікті полиция қызметінің басшысы Данияр Мейірхан мәлімдеді.

Бұл туралы «Abai.kz» порталы «otyrar.kz» сайтына сілтеме жасай отырып хабарлайды.

Əр дүйсенбі сайын қалалық жергілікті полиция қызметінің басшысы мен аудандардағы жауапты басшылары (кестеге сəйкес) бейнеқоңырауларға жауап береді. Бұған қоса азаматтар апта бойы @Shymkent_mps аккаунтына қоңырау соғып, бейне сауалдарды қалдыра алады.

«Учаскелік полиция инспекторлары мен кəмелетке толмағандар ісі жөніндегі инспекторлардың қызметіне қатысты шағым немесе ұсыныстарыңыз болса, Skype арқылы қоңырау шалуы қажет. Бейнеконференция жазып алынады жəне əр шағымға жергілікті полиция қызметкерлері міндетті түрде ден қояды. Аталған қызмет биылғы 5 қыркүйектен басталады» деп жазады Данияр Мейірхан.

Естеріңізде болса, ОҚО жергілікті полиция қызметінің жұмысы туралы мәжіліс өткен еді.

Еске салайық, Мемлекет басшысы Н.Назарбаевтың бес институционалдық реформасын жүзеге асырудың «100 нақты қадамы» - Ұлт жоспарын орындау аясында Қазақстанның барлық өңірлерінде жергілікті полиция қызметі құрылған болатын. Жиында негізгі баяндамашы ретінде ОҚО Жергілікті полиция қызметінің бастығы Б.Абылаев болды. Құрылым басшысының айтуынша, ОҚО-да жергілікті полиция қызметінің жұмысын ұйымдастыру бойынша қажетті шаралардың барлығы жасалған.

Abai.kz