БҰҰ Алеппода әуе шабуылдары уақытша тоқтағанын растады
БҰҰ Бас хатшысы Пан Ги Мун сириялық Алеппо провинциясында әуе соққылары тоқтағанын мәлімдеді. БҰҰ Бас Ассамблеясының бейсенбі күнгі бейресми отырысында ол Ресейдің Алеппоны атқылауын тоқтату туралы шешіміне қолдау білдірді.
Бас хатшының айтуынша, ұйым жанжал аймағына дәрі-дәрмек жеткізу жұмыстарын бастап кетті. Дегенмен халықаралық ұйым Алеппо қаласының шығыс бөлігіне гуманитарлық жүкті толық жеткізе алмай отыр.
Бейсенбі күні Алеппода 11 сағаттық "гуманитарлық үзіліс" басталды. Осы уақытта Ресей мен сириялық үкімет әуе соққыларын доғара тұрады. Қалада гуманитарлық дәліздер ашылды. Сол арқылы бейбіт тұрғындар мен қарулы бүлікшілер қаланы тастап кете алады. Кейінірек Ресейдің қорғаныс министрі Сергей Шойгу гуманитарлық үзіліс бір тәулікке созылатынын мәлімдеді.
Abai.kz
