Оңтүстік Қазақстан облысы, Бәйдібек ауданындағы ауылшаруашылығы саласындағы жыл қортындыларына сәйскес, биыл аудан экономикасын дамыту мақсатында 11 инвест жоба іске асырылған. Желтоқсан айындағы деректерге сүйенсек, аудан әлеуетін арттыру мақсатында қосымша инвестициялар тарту бойынша үш бағытта жұмыс атқарылған.

Бірінші бағытта жалпы құны 929 млн теңге болатын травертин тастарын өндіретін төрт жоба болса, екіншісі ретінде баламалы электр энергиясын өндіретін тағы да төрт жоба іске асты. Ал үшінші бағыттағы жобалар ауыл шаруашылығы саласына арналып отыр. 

"Олар тауарлы сүт фермасы және сүтті қайта өңдеу зауыты мен асыл тұқымды ірі қара мал шаруашылығы және құрылыс материалдарын шығаратын өндіріс орындары және өңірдегі мал басын көбейтіп, асыл тұқымды мал шаруашылығын өрістету үшін алдымен жайылымдық жер көлемін ұлғайту күн тәртібіндегі мәселе болып тұр".дейді аудан басшысы.

Одан бөлек облыс әкімінің индустриялды аймақтар құру туралы тапсырмасына сәйкес Боралдай ауылдық округіндегі Жыланды елдімекенінен 21 га жер белгіленген. Қажетті инфрақұрлым тартуға 326,6 млн теңге қаралып, құрылыс аяқталды.

Сондай-ақ, индустриялды аймақты ұлғайту мақсатында қосымша 39 га жер белгіленіп, нәтижесінде 60 га жетіп отыр. Бұл аймаққа жоғарыда аталған травертин тастарын өндіретін төрт зауыт енгізілмек.

Сонымен қатар ауданнан 895 га жер телімі араб инвесторы Шейх Халифаның құс өсіру орталығына беріліп, бүгінге дейін мұнда 3,5 млрд теңге шетел инвестициясы тартылды. Онда 120 адам жұмыс атқарса, оның 30 пайызы — аудан тұрғындары.

Алдағы уақытта жобаның екінші кезеңі іске асып, тағы 3,5 млрд теңге шетел инвестициясы тартылмақ. Аудан әкімдігі мен құс өсіру орталығының басшылығы арасында келісім жасалып, жобаны жүзеге асыру нәтижесінде жаңадан ашылатын 400-ге жуық жұмыс орнының 80 пайызына бәйдібектік тұрғындар қамтылатын болады.

Сонымен қатар қосымша кіріс көздерін қалыптастыру үшін құс өсіру орталығын салық төлеуші ретінде аудан есебіне тіркеу мақсатында тиісті жұмыстар атқарылуда деп баяндады сала жауаптылары.

Абай-ақпарат