Қарағанды. 22 қаңтар. ҚазТАГ – Қарағанды облысы Шахтинск қаласының әкімі болып Ерсаин Нагаспаев тағайындалды. Жаңа басшыны активке Қарағанды облысының әкімі Серік Ахметов таныстырды.

«ҚР президентінің әкімшілігімен үйлестіріп және қалалық мәслихат депутаттарының келісімін алған соң, мен өзімнің өкімімен Шахтинск қаласының әкімі етіп Ерсаин Нағаспаевты тағайындаймын», - деді аймақ басшысы.

Еске салсақ, қаланың бұрынғы әкімі Ерлан Өтешов бұрынырақ Қарағанды облысының Приозерск қаласының әкімдігіне тағайындалған.

31 жасар Е. Нағаспаев Е. Букетов атындағы Қарағанды мемлекеттік университетін «экономист-менеджер» мамандығы бойынша бітірген. 2000-шы жылдан мемлекеттік қызметте. ҚР сыртқы істер министрлігінде жұмыс істеді, ҚР вице-премьерінің кеңесшісі, Қарағанды қаласының Қазбек би ат. аудан әкімінің көмекшісі қызметтерін атқарды. Осы тағайындауға дейін Қарағанды облыс әкімінің кеңесшісі болды.