Оқиға шілденің 29-ы күні Тәжікстанның Хатлон облысы Даңғара ауданында орын алды. Белгісіз біреулер велосипедпен саяхаттап жүрген шетелдік туристер тобын көлікпен қағып, оқиға орнынан қашып кеткен. Оқиға салдарынан АҚШ-тың екі азаматы, голландиялық және Швейцарияның бір азаматы қаза тапты. Тағы бірнеше шетелдік жараланып, ауруханаға жеткізілді.

ИМ идеологиясын жүргізетін Amaq ақпараттық сайты 31 шілдеде видео жариялады. Онда шетелдік туристерді өлтірді деп айыпталып отырған төрт жас жігіт ИМ басшысы Әбубәкір Әл-Бағдадиға ант беріп жатыр. Ант берушілер талдың астында, Нүрек суқоймасы жағасында отыр, олардың артында ИМ-нің қара жалауы ілулі тұр.

Видеороликте терактіден кейін ұсталды деп хабарланған Хусейн Абдусамадов орыс тілінде сөйлейді. Видеодан ұстау кезінде қарсылық білдіргендіктен өлтірілді делінген Джафаридин Юсупов пен Зафар Сафаровты да байқауға болады. ИМ шетелдік туристерге шабуылды мойнына алған.

Тәжікстан бас прокуратурасы бұл оқиғаға қатысты терроризм және адам өлтіру ісі бойынша қылмыстық іс қозғалғанын мәлімдеді.

Abai.kz