Бейсенбі, 17 Маусым 2021
46 - сөз 5048 8 пікір 28 Қараша, 2018 сағат 11:04

Ақшаны ойлап басы қатып жүргендерде қайдағы биіктік?

Жұмабек Тәшенев ақсақалды айтамын-ау, Желтоқсан оқиғасына бір ай қалғанда дүниеден озыпты жарықтық. Бар болғаны 71 жасында... Сексенге келіп қалған биліктің зейнеткерлер отряды әлі отыр қалғып-мүлгіп... 71 деген жас па еді, Жұмабектей шын асылға...
Бір айдан соң... Кеңестік жүйеге қарсы мыңдаған жас "Тәшенев" бас көтеретінін көрмей кетті...

Қайтқан адамның руxы қырық күнде тәнінен ажырайды деуші еді. Сол кісінің жер бетінде қалықтаған руxы ма екен, жасып қалған ұлттың жігерін жебеп, өзі шексіз сүйіп, адал қызмет етіп кеткен қазағының алдындағы соңғы миссиясын "жан ұшыра" орындап кеткен... Кім біліпті... ?

Ал қазір бір жас тұлғалар лауазымды орынға келсе, іштей қуанып жүресің: "әй, неде болса, қазақтың жас "Тәшеневтер" осылар шығар" деп. Дем берейік деп жақсы ісін қорисың... Жаман сөз естісең де, жамандыққа қимай, жақсыға жорисың... Сөйтсең, оның қодыққа мінген жай ғана қортық болып шығады. Ақша жейді, қиянат жасайды, өсек айтады, қазақтың басынан сипаудың орнына, маңдайынан аямай тебеді. "Анау мені сынады, оның отбасын асырап отырған жобасына ақша бермей қойыңдар, аш жүрсін, көрейік, ол сорлының бейшара күйге түскенін" деп іштей масаттанады солардың біреуі. "Мынау бізді көп сынап кетті, ол "шантажисттің" сазайын тартқызып, жұмыссыз қалдырайық. Бойындағы таланты мен шексіз білімін базарға барып дорбаға өткізсін " деп қарқ-қарқ күледі екіншісі. " Мынандай жұмақ өмірге риза болмай жүрген анау сынағыш псиxопат не псиxопатканы отбасы арқылы былай қыссақ ше? (Билікті сынағандардың бәрі псиxопат олар үшін) Әнеу бір интеллектуал пәленбайдың еңбегін өзіміз пайдаланып, етін өзіміз жеп, сүйегін сылып соған лақтырып, өзімізге бағынышты қылайық. Ол сорлыға сол жетеді",- деп "гениальный" ой қосады үшіншісі...

Нағыз "Тәшеновтер" болса: 

"Анау неге ашынып кетті... Неге осы күйге түсті? Осы күйге түсірген кім? Мынау неге жылап жүр? Ал анау неге шаршап жүр? Тіпті шантажист болған күннің өзінде, мұны мұндайға түсірген жоқтық па екен, тоқтықтан бүйтпес. Қой, осы қазақтың бір азаматын жаман жолдан сақтап қалайықшы. Анау бір мықтыны қолдап жіберейік, ұлтқа қызмет етсін. Қазақтың игі жақсы жастары сабылып кетті ғой" деп, шақырып алып, басынан сипап, жанарынан төгілген жасты қолымен сүртіп, жол нұсқаушы еді... Бұл боркеміктер биліктің буына мас болғаны соншалық, көздерін шел басты. Қазақты танудан қалды... Олардың ең "аяулы" мақсаты - биліктегі "тяжеловестерге" қызмет етсе болғаны...

Бірді бірге соғып жүріп, бірі мемлекеттік xатшы, екінші Президент, үшіншісі Премьер болуды іштей армандап, өзара құпия күресіп жүреді тағы. 90-шы жылдары билікке келген "жас түріктер" Жандосов, Жақиянов, Ертлесовалар дәл бұлай сұйылмап еді... Еееее, оларда терең білім мен мінез болды ғой...

Қызмет пен ақшаны ойлап басы қатып жүргендерде қайдағы биіктік? Қайдағы парасат? Тәшеневтен садаға кетіңдер!

Дина Елгезектің facebook парақшасынан

Abai.kz

8 пікір