Қырғызстандық БАҚ-тың мәліметінше, 2018 жылдың желтоқсан айында тасымалдаушылар қозғалыс кестесін өзгерткен. Бірақ қазақ тарабы алдын-ала келісілмегендіктен, заңсыз екенін айтып, ескерту жіберген. Осыдан кейін тасымалдаушылар тиісті құжаттарды рәсімдеп, Қазақстан билігіне жіберген. Бірақ әлі жауап алмағанын айтады.

БАҚ-та жазылғандай, Қазақстанның көлік комитеті халықаралық "Бішкек-Ташкент" жолаушылар бағытына қазақстандық тасымалдаушыны қосуды ұсынған. Азаттықтың қырғыз қызметінің көлік министрлігіндегі дереккөзі бұл ақпаратты растаған. Оның айтуынша, қазір келіссөз жүріп жатыр.

Қырғызстан мен Өзбекстан 2018 жылдың мамыр айынан бері Бішкектен Ташкентке және кері бағыттағы рейстерді ашқан. Бұл рейстерді Өзбекстан тарапынан Mironshox Grand Trans, Қырғызстан жағынан "Транс Союз-Азия" тасымалдаушы компаниясы жүзеге асырады.

Маршрут қашықтығы - 601 км. Автобус жолда Қырғызстанның "Чалдовар" мен "Супатай Батыр", Қазақстанның "Жібек Жолы" және Қазақстан мен Өзбекстан шекарасындағы "Гишт куприк" бекеттерін кесіп өтеді.

Abai.kz