Қазақстан Республикасы Парламенті Мәжілісінің депутаты, Мәжілістің Экономикалық реформа және өңірлік даму комитетінің төрағасы, «Нұр Отан» партиясы парламенттік фракциясы жетекшісінің орынбасары Нұртай Сабильянов Шығыс Қазақстан облысында сайлаушылармен жүздесті, - деп хабарлайды Абай-ақпарат.

Шығыс Қазақстан облысының тұрғындары депутатқа денсаулық сақтау, әлеуметтік қамсыздандыру, білім беру салаларындағы, агроөнеркәсіптік кешенді дамыту, кәсіпкерлікті қолдау, тұрғын үймен, Интернет байланысымен қамтамасыз ету, автожолдарды жөндеу және басқа да мәселелерді Парламент мінберінде көтеруін сұрады.

Нұртай Сабильянов Аягөз ауданының Малкелді, Баршатас, Өркен, Бозай, Шыңқожа ауылдарында және Аягөз қаласында, Үржар ауданының Үржар, Қаратума, Көкөзек, Науалы, Келдімұрат, Мақаншы, Қаратал ауылдарында, Абай ауданының Қарауыл, Кеңгірбай би, Құндыз ауылдарына барып, халықтың жай күйімен танысты.

Нұртай Сабильянов ауыл тұрғындарына Қазақстан Республикасының Президенті Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауының, Президенттің бес әлеуметтік бастамасының, «Нұр Отан» партиясының сайлауалды бағдарламасының жүзеге асырылуы туралы ақпарат берді.

Сонымен қатар депутат сайлаушыларға Парламент депутаттарының заң шығару қызметі туралы айтты.

Сайлаушылардың қойылған барлық сұрақтарына депутат жауап берді. Сондай-ақ, Аягөз қаласында депутат медицина қызметкерлермен, білім беру қызметкерлерімен, құқық қорғаушылар органы өкілдерімен жеке кездесулер өткізді.

Сонымен қатар Нұртай Сабильянов Аягөз қаласында жастармен, ал Үржар ауданының Науалы ауылында Балалар үйінің тәрбиеленушілерімен кездесті.

Abai.kz