Пойыздар 1-маусымнан бастап жүре бастайды
ҚР Премьер-министрінің орынбасары Ералы Тоғжановтың төрағалығымен өткен Коронавирус инфекциясының таралуына жол бермеу жөніндегі ведомствоаралық комиссияның отырысында экономика салаларын қалпына келтіруге және халықты жұмыспен қамтуға бағытталған бірқатар нақты шешім қабылданды.
2020 жылғы 13 мамырдан бастап Шымкент, Ақтау, Орал, Жезқазған, Балқаш, Үржар, Зайсан қалаларына әуе рейстері ашылады.
2020 жылғы 18 мамырдан бастап санитариялық талаптарға сай жұмыс істеуге рұқсат беріледі:
- қонақ үйлерге;
- сыйымдылығы 30 адамдық орынға дейінгі қоғамдық тамақтану объектілеріне;
- таза ауада қызмет көрсететін қоғамдық тамақтану объектілерінің жазғы алаңдарына;
Сонымен қатар, ағымдағы жылғы 18 мамырдан бастап жалпы ғимарат көлемінің 30 пайызын ғана толтыра отырып санитариялық нормаларды сақтаумен діни құлшылық жасау нысандары жұмысқа кіріседі.
2020 жылғы 1 маусымнан бастап Мемлекеттік бас санитарлық дәрігердің талаптарын сақтауды ескере отырып, кезең-кезеңмен ішкі теміржол қатынасын жандандыру жоспарланып отыр. Билеттер 2020 жылғы 15 мамырдан сатыла бастайды.
Сонымен қатар, шетелдегі Қазақстан азаматтарын елге қайтару мәселелері қаралды.
Отырыс қорытындысы бойынша Премьер-министрдің орынбасары Е. Тоғжанов бірнеше нақты тапсырма берді.
Abai.kz
