Бүгін Беларусь астанасында Еуразиялық үкіметаралық кеңестің кезекті жиыны өтті. Сол жиында Қазақстанның премьері Асқар Мамин Ресей премьері Михаил Мишустинмен жүзбе-жүз жеке кездескен.

«Sputniknews.kz» сайты екі ел премьерлерінің екеуара әңгімесінен аз-кем ақпарат шығарыпты. Әңгіме барысында Асқар Мамин коронавируспен күресте Қазақстанға көрсетіп жатқан Ресейдің көмегі үшін, атап айтқанда дәрі-дәрмек, медициналық жабдықтар түріндегі гуманитарлық жүк пен Қазақстанға жіберілген 30 шақты дәрігер үшін Мишустинге алғыс айтыпты.

«Ең маңыздысы біз Қазақстанға келіп, өңір-өңірлерде көмектесіп жүрген Ресейлік дәрігерлердің кеңесін алдық», - депті Мамин.

Ол сондай-ақ, Ресей ғалымдары әзірлеп, қазір сынақтан өткізіп жатқан коронавирусқа қарсы вакцина туралы да айтқан екен.

«Михаил Владимирович, осыған байланысты, вакцина өндірісі басталған кезде Қазақстан ол вакцинаны алғашқылардың бірі болып алады деп үміттенемін. Бұл өте маңызды», - депті Асқар Ұзақбайұлы. Бұл ақпаратты орыс сайттары да сүйіншілеп жазып, таратып жатыр екен.

Естеріңізге сала кетейік, бүгін ғана Қазақстанда коронавирусқа қарсы вакцина шығаратын зауыт құрылысы басталғаны хабарланған еді. Имуннобиологиялық дәрі-дәрмек және басқа да медициналық өнімдер шығаратын биофармацевтикалық зауыт Жамбыл облысы, Қордай ауданында салынатыны айтылған. Оның жобалық құжаттарына Үкіметтік резервтен 685,8 миллион теңге бөлінген.

Abai.kz