Алматыдағы театрлар 6 қазаннан бастап жұмысына қайта оралуы мүмкін. Бұл туралы қаланың бас мемлекеттік санитарлық дәрігерінің қаулысында айтылған. Ал, Қазақстанның басқа қалаларында театрларға 17 қыркүйекте жұмыс істеуге рұқсат етілді.

Қаулыға сәйкес, театрларда отыру орындарының толуы 50% аспауы тиіс.

«Мәдени нысандарда әлеуметтік арақашықтық сақталуы міндетті. Сондай-ақ, санитарлық-дезинфекциялық режим, желдету және ауаны баптау жүйелері үздіксіз жұмыс істеп тұруы керек. Оған қоса, ауаны сәулелендіру (кварц) ұсынылады», - делінген Алматы қаласының бас мемлекеттік санитарлық дәрігері Жандарбек Бекшиннің коронавирус инфекциясын алдын-алу жөніндегі жаңа қаулысында.

Құжат 6 қазанда сағат 00:00-де күшіне енеді.

Айта кетейік, Алматыда дәмханалардың, көлік жуу орындарының, көлікке техникалық қызмет көрсету станцияларының, жалпы адаммен байланыссыз жұмыс істейтін нысандардың жұмыс уақыты ұзартылды.

Abai.kz