28 қыркүйекте Қазақстан президенті Тоқаев Алманияға ат басын тіреп, неміс канцлері Олаф Шольцпен бірлесе өткізген баспасөз конференциясында сөз сөйлеп, Ресейге қатысты пікір айтты.

Өзіне дейін көмекшісі Тимур Сүлейменовтің: «Біз Ресей мен Беларусьпен экономикалық одақта болсақ та, біз бәрі бір әлемдік қауымдастықтың бір бөлігі болып табыламыз. Астана АҚШ пен Еуроодақтың шектеулерін аттап өтудің құралына еш айналмайды», - деген пікірін одан ары дамыта: «Қазақстан анти-Ресей емес, бірақ, қай кезде болмасын санкциялық шектеулерді ескеріп отырады», - деген болатын.

«Казинформ» басылымына берген жауабында президент Тоқаев: «Қазақстан анти-Ресей болып табылмайды, біз әлемдегі ең ұзын шекара біріктіретін Ресеймен жан-жақты ынтымақтастығымызды қатаң ұстанамыз», - деді.

«Кейбір ресейлік БАҚ-тар мен саяси қайраткерлері Сіздің Берлиндегі баспасөз конференциясында айтқан сөзіңізді «Ресейден ірге ажыратып, Батыстың жыртысын жыртуға кірісті» деп сын садағына алып жатыр?» деген кезекті сауалға Президент: «Баса айтарым, Қазақстан санкциялық шектеу қойылған тауарларға иелік етпейді, әрі онымен сауда жасамайды. Сондай-ақ Ресейге жасалатын  параллельді импортқа қатыспайды», - деп жауап берді..

Әрі осы сұхбатты: «Егер қолымнан келсе, қазір атысып-шабысып жатқан екі елді бітістірер едім», - деп тамамдады.

Abai.kz