«Жаңа Қазақстан» қазан айының 21-і күні «Ескі Қазақстанның» аты әйдік өкілі Марат Бекетаевты тұтқындады. Ол 2016 жылдан бастап 2022 жылға дейін Әділет министрлігін басқарған.

Сыбайлас жемқорлыққа қарсы іс-қимыл агенттігі экс-министрді тұтқындау себебін «лауазым өкілетін асыра пайдалануы», «талап етілмейтін қызметтерді көрсетуге жыл сайынғы келісімшарттар жасау арқылы үлестес компанияның мүдделерін қолдап, мемлекетке үлкен зиян келтірген» болуы мүмкін деген күдікке ілінгенімен түсіндірді.

Естеріңізде болса, Марат Бекетаев «Қаңтар оқиғасынан» кейін қызметінен шеттетілген, кейін ол премьер-министрдің кеңесшісі қызметіне тағайындалған.

Бекетаев «Қаңтар оқиғасы» бойынша кінәлі деп танылып, қазір жазасын өтеп жатқан Ұлттық қауіпсіздік комитетінің бұрынғы төрағасы Кәрім Мәсімовке жақын болып саналады. Ол Қасым-Жомарт Тоқаев президент болғаннан бастап, оған қарсы екенін бірнеше рет ашық көрсеткен.

Бұрынғы министрдің мемлекеттік тілді меңгермегені үшін қоғамның сынына қалып, «қазақ тілін үйренуге» уәде бергені де көпшілікке мәлім. Алайда, экс-министріміз уәдесін орындамаған болатын.

«Бекетаев 21 қазанда әуежайда тұтқындалған. Ол әуелі Ыстамбұлға ұшып, одан ары Лондонға табан тіремек болған», - дейді БАҚ.

Abai.kz