«جاڭا قازاقستان» قازان ايىنىڭ 21-ءى كۇنى «ەسكى قازاقستاننىڭ» اتى ايدىك وكىلى مارات بەكەتاەۆتى تۇتقىندادى. ول 2016 جىلدان باستاپ 2022 جىلعا دەيىن ادىلەت مينيسترلىگىن باسقارعان.

سىبايلاس جەمقورلىققا قارسى ءىس-قيمىل اگەنتتىگى ەكس-ءمينيستردى تۇتقىنداۋ سەبەبىن «لاۋازىم وكىلەتىن اسىرا پايدالانۋى»، «تالاپ ەتىلمەيتىن قىزمەتتەردى كورسەتۋگە جىل سايىنعى كەلىسىمشارتتار جاساۋ ارقىلى ۇلەستەس كومپانيانىڭ مۇددەلەرىن قولداپ، مەملەكەتكە ۇلكەن زيان كەلتىرگەن» بولۋى مۇمكىن دەگەن كۇدىككە ىلىنگەنىمەن ءتۇسىندىردى.

ەستەرىڭىزدە بولسا، مارات بەكەتاەۆ «قاڭتار وقيعاسىنان» كەيىن قىزمەتىنەن شەتتەتىلگەن، كەيىن ول پرەمەر-ءمينيستردىڭ كەڭەسشىسى قىزمەتىنە تاعايىندالعان.

بەكەتاەۆ «قاڭتار وقيعاسى» بويىنشا كىنالى دەپ تانىلىپ، قازىر جازاسىن وتەپ جاتقان ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ماسىموۆكە جاقىن بولىپ سانالادى. ول قاسىم-جومارت توقاەۆ پرەزيدەنت بولعاننان باستاپ، وعان قارسى ەكەنىن بىرنەشە رەت اشىق كورسەتكەن.

بۇرىنعى ءمينيستردىڭ مەملەكەتتىك ءتىلدى مەڭگەرمەگەنى ءۇشىن قوعامنىڭ سىنىنا قالىپ، «قازاق ءتىلىن ۇيرەنۋگە» ۋادە بەرگەنى دە كوپشىلىككە ءمالىم. الايدا، ەكس-ءمينيسترىمىز ۋادەسىن ورىنداماعان بولاتىن.

«بەكەتاەۆ 21 قازاندا اۋەجايدا تۇتقىندالعان. ول اۋەلى ىستامبۇلعا ۇشىپ، ودان ارى لوندونعا تابان تىرەمەك بولعان»، - دەيدى باق.

Abai.kz