Президент Қасым-Жомарт Тоқаев бүгін Ресей Федерациясына барып, Қазан қаласында өтетін «Болашақтың ойындары» халықаралық турнирінің ашылу рәсіміне қатысады.

Аталған іс-шараға Беларусь, Қырғызстан, Тәжікстан және Өзбекстан президенттері, сондай-ақ басқа да бірқатар мемлекеттің өкілдері қатысады деп жоспарланған.

«Болашақ ойындары» гибридтік спорт түрлері бойынша алғашқы халықаралық мультиспорттық жарыс Қазан мен Сочиде 21 ақпан мен 3 наурыз аралығында өтеді.

Жарыстың әрбір түрі классикалық спорт пен киберспорт немесе VR/AR-технологиясын біріктіреді. Мұндай спорттық пәндерді сипаттау үшін «фиджитал» (physical + digital) сөзі пайдаланылады.

Спортшылар физикалық және сандық мүмкіндіктер шегінде күресетін болады. Ұсынылған жарыстардың арасында фиджитал-футбол және хоккей, дрондар жарысы, роботтар шайқасы және т.б. болады.

Abai.kz