Мысырда Газа мәселесіне қатысты декларацияға қол қойылды Шарм-эш-Шейх қаласында өткен саммит қорытындысы бойынша АҚШ, Мысыр, Қатар және Түркия көшбасшылары Газа секторында атысты тоқтату туралы декларацияға қол қойды.

Құжат Дональд Трамп әзірлеген 20 тармақтан тұратын бейбітшілік жоспарының негізінде қабылданған және оған халықаралық делдалдар қатысқан.

– Біз барлығы мүмкін емес деп санаған мақсатқа қол жеткіздік. Енді, ақыры, Таяу Шығыста бейбітшілік орнады, – деді Трамп жиынға қатысқан жиырмадан астам мемлекет басшылары алдында.

Саммит күні Таяу Шығыстағы ұзаққа созылған қақтығысты тоқтату жолындағы тағдырлы күн болды: Израильге екі жылдан астам тұтқында болған барлық тірі тұтқындар қайтарылды, ал екі мыңға жуық палестиналық тұтқын мен сотталған азамат өз отанына оралды.

– Сенесіз бе, бұл сәтке жету үшін үш мың жыл керек болды. Бірақ бұл жолғы бейбітшілік тұрақты болады, – деді Трамп.

Abai.kz