Қысқы Олимпиада ойындарына 10 күн қалды...

Сурет: ҚР Туризм және спорт министрлігінен алынды.

Италияда өтетін 2026 жылғы қысқы Олимпиада ойындарының ашылуына 10 күн қалды!

Төрт жылдықтың басты додасында Қазақстан Республикасының ұлттық құрамасы спорттың 10 түрі бойынша бақ сынайды. Ел намысын барлығы 36 спортшы қорғайды. Оның ішінде 18 ер және 18 әйел спортшы бар.

Ұлттық құраманың орташа жасы – 25 жас. Команда сапындағы ең жас спортшы – фристайл-акробатикадан сынға түсетін Асан Асылхан, ол небәрі 16 жаста. Ал ең тәжірибелі әрі жасы үлкен спортшы – шорт-тректен ел намысын қорғайтын Абзал Ажгалиев, жасы 33-те.

Құрамадағы ең тәжірибелі спортшылардың бірі – фристайл-могул шебері Юлия Галышева. Ол 2018 жылғы Олимпиада ойындарының қола жүлдегері, сондай-ақ 2010, 2014, 2018 және 2022 жылдардағы Олимпиада ойындарының қатысушысы.

Айта кетейік, Қысқы Олимпия ойындары 2026 жылғы 6–22 ақпан аралығында Италияда өтеді. Дүбірлі додаға әлемнің 93 елінен 3 500-ден астам спортшы қатысады деп жоспарланған.