БАЛА ҚҰҚЫҚТАРЫ – ЖАҢА КОНСТИТУЦИЯНЫҢ ІРГЕТАСЫ: АЛМАТЫДА РЕСПУБЛИКАЛЫҚ СЕССИЯ ӨТТІ

Алматы қаласында еліміздің білім беру саласының мамандары мен сарапшыларының басын қосқан «Бала құқықтары – Жаңа Конституцияның іргетасы» атты республикалық сессия өтті. Шараның басты бағдары – өскелең ұрпақтың әл-ауқатын қамтамасыз етудегі педагогтердің жауапкершілігі мен құқықтық тетіктерді жүйелеу болды.

Сессияның барысында педагогтердің кәсіби өзара әрекеттестігі мәселесі қозғалды. Жиынға қатысқан 150-ден астам маман білім беру мекемелерінде бала құқығын қорғаудың ең тиімді тәжірибелерін ортаға салды.

Бала әл-ауқаты – мемлекеттік саясаттың өзегі

Жиынның шымылдығын ашқан «ӨРКЕН» балалардың әл-ауқатын арттыру ұлттық ғылыми-практикалық институтының президенті Елена Сакенова бала құқықтарын қорғау мәселесі Жаңа Конституция аясында сапалық тұрғыдан жаңа деңгейге көтерілгенін атап өтті. Оның айтуынша, балалардың әл-ауқаты бүгінде тек әлеуметтік мәселе емес, мемлекеттік саясаттың негізгі құндылықтық бағдарына айналып отыр.

Психологиялық қауіпсіздік және құқықтық кепілдік

Сессия барысында психология ғылымдарының магистрі, Әл-Фараби атындағы ҚазҰУ-дың ғылыми қызметкері Камшат Жүсіпбаева білім беру ортасындағы психологиялық қауіпсіздік мәселесіне терең тоқталды. Ол Жаңа Конституция нормалары мен баланың жан-дүниесінің қорғалуы арасындағы тығыз байланысты ғылыми тұрғыда негіздеп берді. Ал белгілі заңгер, Алматы қалалық әзербайжандар қауымдастығының Әзербайжан әйелдері кеңесінің төрағасы Джейран Мамедова ана мен баланы қорғаудың мемлекеттік кепілдіктеріне тоқталып, құқықтық сауаттылықтың маңыздылығын алға тартты.

Педагог мәртебесі және жауапкершілік

Сессияның негізгі нәтижесі ретінде білім беру ортасында бала құқықтарын қорғаудың жаңа әдістемелік жүйесінің қалыптасуын атап өтуге болады. Бұл шара педагогтердің Жаңа Конституция құндылықтарын күнделікті іс-тәжірибеде шебер қолдану дағдыларын шыңдап қана қоймай, сарапшылар мен практик-мамандар арасындағы кәсіби байланыстың нығаюына септігін тигізді. Осылайша, жиын қатысушылары баланың әл-ауқатын қамтамасыз етуде ортақ бағыт-бағдар айқындап, салалық ынтымақтастықтың жаңа деңгейіне жол ашты.

Болашаққа бағдар

Ұйымдастырушылардың айтуынша, мұндай жиындар мектеп қабырғасындағы әрбір баланың өзін қауіпсіз әрі еркін сезінуіне, ал ұстаздардың құқықтық шеңберде нық жұмыс істеуіне жол ашады. Сессия соңында қатысушылар баланың әл-ауқатын жақсартуға бағытталған нақты ұсынымдар қабылдады.

«Бала құқығын қорғау – мемлекеттің тұрақты болашағының негізі» екенін тағы бір мәрте дәлелдеген бұл шара білім беру саласындағы маңызды қадамдардың бірі болды.

Abai.kz