Қаржы нарығын реттеу және дамыту агенттігінің төрайымы Мәдина Әбілқасымованың айтуынша, кейбір азаматтардың мерзімі өткен несиесі табысы мен мүлкін тексермей-ақ есептен шығарылуы мүмкін, деп хабарлайды Qaz365.kz.

Қазіргі талап бойынша қарызды есептен шығару үшін екі шарт сақталуы тиіс:

• табыс екі ең төменгі жалақы мөлшерінен (шамамен 170 мың теңге) аспауы керек;
• азаматтың атына тіркелген мүлкі болмауы қажет.

Алайда кейбір санаттағы адамдар үшін бұл талаптар қолданылмайды.

Кімдердің қарызы тексерусіз кешіріледі?

Мәдина Әбілқасымованың сөзінше, егер несие бойынша берешек 5 жыл және одан да көп уақыт өтелмей тұрса, жоғарыдағы екі талап күшін жояды.

«Егер берешек 5 жылдан асса, бұл екі шарт қолданылмайды. Азамат еш кедергісіз өтініш беріп, табысы мен мүлкі тексерілмей-ақ қарызын есептен шығара алады», – деді ол.

Сонымен қатар «проактивті банкроттық» тетігі енгізілмек. Бұл жағдайда мемлекеттік органдар қарызын өтей алмай жүрген азаматтарды өздері анықтайды.

Қаржы министрлігінің мәліметінше, мұндай азаматтарға банкроттық рәсімін қолдану туралы ұсыныс SMS-хабарлама арқылы жіберіледі.

«Оларға SMS жолданып, банкроттық рәсімін қолдану ұсынылады. Қазір бұл мүмкіндікті пайдалануға өтініш беретіндер көп емес», – деді Әбілқасымова.

Бұдан бөлек, 1 шілдеден бастап Қазақстанда несие беру талаптары күшейтіледі. Банктер қарыз алушының төлем қабілетін мұқият тексеріп, жаңа көрсеткіштерге сүйенеді:

• борыштық жүктеме коэффициенті;
• қарыз бен табыс ара салмағы.

Бұл көрсеткіштер азамат табысының қанша бөлігі қарыз өтеуге кетіп жатқанын анықтауға мүмкіндік береді. Көрсеткіш жоғары болған сайын, жаңа несие алу ықтималдығы төмендейді.

Дереккөзі: qaz365.kz

Abai.kz