قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ابىلقاسىموۆانىڭ ايتۋىنشا، كەيبىر ازاماتتاردىڭ مەرزىمى وتكەن نەسيەسى تابىسى مەن مۇلكىن تەكسەرمەي-اق ەسەپتەن شىعارىلۋى مۇمكىن، دەپ حابارلايدى Qaz365.kz.

قازىرگى تالاپ بويىنشا قارىزدى ەسەپتەن شىعارۋ ءۇشىن ەكى شارت ساقتالۋى ءتيىس:

• تابىس ەكى ەڭ تومەنگى جالاقى مولشەرىنەن (شامامەن 170 مىڭ تەڭگە) اسپاۋى كەرەك;
• ازاماتتىڭ اتىنا تىركەلگەن مۇلكى بولماۋى قاجەت.

الايدا كەيبىر ساناتتاعى ادامدار ءۇشىن بۇل تالاپتار قولدانىلمايدى.

كىمدەردىڭ قارىزى تەكسەرۋسىز كەشىرىلەدى؟

ءمادينا ابىلقاسىموۆانىڭ سوزىنشە، ەگەر نەسيە بويىنشا بەرەشەك 5 جىل جانە ودان دا كوپ ۋاقىت وتەلمەي تۇرسا، جوعارىداعى ەكى تالاپ كۇشىن جويادى.

«ەگەر بەرەشەك 5 جىلدان اسسا، بۇل ەكى شارت قولدانىلمايدى. ازامات ەش كەدەرگىسىز ءوتىنىش بەرىپ، تابىسى مەن مۇلكى تەكسەرىلمەي-اق قارىزىن ەسەپتەن شىعارا الادى»، – دەدى ول.

سونىمەن قاتار «پرواكتيۆتى بانكروتتىق» تەتىگى ەنگىزىلمەك. بۇل جاعدايدا مەملەكەتتىك ورگاندار قارىزىن وتەي الماي جۇرگەن ازاماتتاردى وزدەرى انىقتايدى.

قارجى مينيسترلىگىنىڭ مالىمەتىنشە، مۇنداي ازاماتتارعا بانكروتتىق ءراسىمىن قولدانۋ تۋرالى ۇسىنىس SMS-حابارلاما ارقىلى جىبەرىلەدى.

«ولارعا SMS جولدانىپ، بانكروتتىق ءراسىمىن قولدانۋ ۇسىنىلادى. قازىر بۇل مۇمكىندىكتى پايدالانۋعا ءوتىنىش بەرەتىندەر كوپ ەمەس»، – دەدى ابىلقاسىموۆا.

بۇدان بولەك، 1 شىلدەدەن باستاپ قازاقستاندا نەسيە بەرۋ تالاپتارى كۇشەيتىلەدى. بانكتەر قارىز الۋشىنىڭ تولەم قابىلەتىن مۇقيات تەكسەرىپ، جاڭا كورسەتكىشتەرگە سۇيەنەدى:

• بورىشتىق جۇكتەمە كوەففيتسيەنتى;
• قارىز بەن تابىس ارا سالماعى.

بۇل كورسەتكىشتەر ازامات تابىسىنىڭ قانشا بولىگى قارىز وتەۋگە كەتىپ جاتقانىن انىقتاۋعا مۇمكىندىك بەرەدى. كورسەتكىش جوعارى بولعان سايىن، جاڭا نەسيە الۋ ىقتيمالدىعى تومەندەيدى.

دەرەككوزى: qaz365.kz

Abai.kz