АҚШ пен Еуропа Одағы Украинадағы дағдарысқа байланысты Ресейге салынған санкцияларды күшейтті деп хабарлайды «Азаттық». Бұдан бұрын хабарлағанымызда" АҚШ Президенті Барак Обама Еуроодақ мемлекеттерін Ресейге санкция салуға шақырған болатын.

Кеше Брюсселде өткен самитте ЕуроОдақ жетекшілері Украинадағы жағдайға байланысты Ресейге санкция салуды құптады. Сондай-ақ, Еуропалық инвестициялық банк пен Еуропалық қайта құру және даму банкі тарапынан Ресей экономикасына инвестиция бөлуді тоқтата тұру жайлы шешімге келген. Вашингтон тарапы Ресейлік банк, әскери және энергетика салаларына шектеу қоюды көздеп отыр. АҚШ қаржы министрлігінің мәлімдеуінше, бұл тізімге ресейлік «Роснефть», «Внешэкономбанк», «Новатек» және «Газпромбанк» енгізілген.

Ал санкцияға ілінген жеке адамдардан Ресей федералдық қауіпсіздік қызметі (ФСБ) жедел ақпарат және халықаралық байланыстар қызметінің жетекшісі Сергей Беседа, Мемлекеттік дума төрағасының орынбасары Сергей Неверов, Қырым ісі бойынша министр Олег Савельев пен Ресей президентінің көмекшісі бар. 

Abai.kz