«Оңтүстік» индустриалды аймағында тоқтап тұрған кәсіпорын жоқ. Бұл туралы осы аймақтың бас директоры Мұхтар Тұрабеков мәлімдеді. Оның айтуынша, күнгейде 7 индустриалды аймақ пайдалануға берілген. Бір ғана Тассай индустриалды аймағында фармацевтика, машина жасау және жиһаз индустриясы салаларының кластерлік дамуына жол ашылған. Ал Бадам қазақ-түрік индустриалды аймағында машина жасау және металлургияға аса көңіл бөлінген. Аталмыш аймақтардағы өндірістік алаңдарының құрылысы биыл бітеді.

 Елбасының тікелей тапсырмасымен Оңтүстікте көлемі 592 гектарды құрайтын 7 индустриалды аймақ пайдалануға берілген. Олар Түркістан, Кентау қалалары мен Созақ, Қазығұрт, Мақтарал, Түлкібас аудандарында. Бүгінде оларда құрылыс материалдары, цемент, су, газ құбырларынан бастап құрылысқа қажетті өзге де көптеген заттар шығарылуда. Ашылған индустриалды аймақтарда 78 млрд теңгені құрайтын 80 инвестициялық жоба жүзеге асырылуда.

 Шымкенттегі Тассай индустриалды аймағы фармацевтика, машина жасау, жиһаз индустриясы салаларының кластерлік дамуына бағытталған. Ал Бадам индустриалды аймағында шатыр материалынан бастап арнайы техника, электр құрылғыларын және де жеңіл көлік шығаратын өндіріс орындарының құрылысы жоспарлануда. Оңтүстік өңірінде болат құю зауыты да болады.

 «Бизнестің жол картасы — 2020» мемлекеттік бағдарламасының аясында республикалық бюджеттен бөлінген қаржыға индустриалды аймақтарға инфроқұрылым тартылып, шағын және орта бизнесті дамытуға жағдай жасалуда. Отандық өнімдердің қатары неғұрлым көп болса, тауарлардың бағасы да қолжетімді болатыны анық.

Abai.kz