«وڭتۇستىك» يندۋستريالدى ايماعىندا توقتاپ تۇرعان كاسىپورىن جوق. بۇل تۋرالى وسى ايماقتىڭ باس ديرەكتورى مۇحتار تۇرابەكوۆ مالىمدەدى. ونىڭ ايتۋىنشا، كۇنگەيدە 7 يندۋستريالدى ايماق پايدالانۋعا بەرىلگەن. ءبىر عانا تاسساي يندۋستريالدى ايماعىندا فارماتسەۆتيكا، ماشينا جاساۋ جانە جيھاز يندۋسترياسى سالالارىنىڭ كلاستەرلىك دامۋىنا جول اشىلعان. ال بادام قازاق-تۇرىك يندۋستريالدى ايماعىندا ماشينا جاساۋ جانە مەتاللۋرگياعا اسا كوڭىل بولىنگەن. اتالمىش ايماقتارداعى وندىرىستىك الاڭدارىنىڭ قۇرىلىسى بيىل بىتەدى.

 ەلباسىنىڭ تىكەلەي تاپسىرماسىمەن وڭتۇستىكتە كولەمى 592 گەكتاردى قۇرايتىن 7 يندۋستريالدى ايماق پايدالانۋعا بەرىلگەن. ولار تۇركىستان، كەنتاۋ قالالارى مەن سوزاق، قازىعۇرت، ماقتارال، تۇلكىباس اۋداندارىندا. بۇگىندە ولاردا قۇرىلىس ماتەريالدارى، تسەمەنت، سۋ، گاز قۇبىرلارىنان باستاپ قۇرىلىسقا قاجەتتى وزگە دە كوپتەگەن زاتتار شىعارىلۋدا. اشىلعان يندۋستريالدى ايماقتاردا 78 ملرد تەڭگەنى قۇرايتىن 80 ينۆەستيتسيالىق جوبا جۇزەگە اسىرىلۋدا.

 شىمكەنتتەگى تاسساي يندۋستريالدى ايماعى فارماتسەۆتيكا، ماشينا جاساۋ، جيھاز يندۋسترياسى سالالارىنىڭ كلاستەرلىك دامۋىنا باعىتتالعان. ال بادام يندۋستريالدى ايماعىندا شاتىر ماتەريالىنان باستاپ ارنايى تەحنيكا، ەلەكتر قۇرىلعىلارىن جانە دە جەڭىل كولىك شىعاراتىن ءوندىرىس ورىندارىنىڭ قۇرىلىسى جوسپارلانۋدا. وڭتۇستىك وڭىرىندە بولات قۇيۋ زاۋىتى دا بولادى.

 «بيزنەستىڭ جول كارتاسى — 2020» مەملەكەتتىك باعدارلاماسىنىڭ اياسىندا رەسپۋبليكالىق بيۋدجەتتەن بولىنگەن قارجىعا يندۋستريالدى ايماقتارعا ينفروقۇرىلىم تارتىلىپ، شاعىن جانە ورتا بيزنەستى دامىتۋعا جاعداي جاسالۋدا. وتاندىق ونىمدەردىڭ قاتارى نەعۇرلىم كوپ بولسا، تاۋارلاردىڭ باعاسى دا قولجەتىمدى بولاتىنى انىق.

Abai.kz