Путин: "Ресей АҚШ-пен қарым-қатынасының түзелгенін қалайды"
Президент Владимир Путиннің мәлімдеуінше, Ресей АҚШ-пен қарым-қатынасының толық түзелгенін қалайды. Мемлекет басшысының пікірінше, бұл "оңайға түспейді", бірақ Кремль "өз қадамын жасауға дайын", - деп хабарлады "Интерфакс".
Путиннің баспасөз хатшысы Дмитрий Песковтың айтуынша, Құрама Штаттардың жаңадан сайланған президенті Дональд Трамп ресми түрде қызметіне кіріспейінше, ресейлік басшы онымен келіссөздер жүргізбейді.
АҚШ-тағы сайлаудың нәтижесінде Республикалық партияның өкілі Дональд Трамп сайлау алқасының 270-тен астам дауысын иеленіп, елдің 45-ші президенті атанды. Ресей Мемлекеттік думасының депутаттары оның жеңісін қуанышпен қарсы алды.
Сайлау нәтижелері жарияланған соң Трамп өзінің жақтастары алдында сөз сөйлеп, АҚШ-тың мүддесі үшін қызмет ететінін, бірақ басқа да елдерге "әділ" қарайтынын мәлімдеді.
"Біз жауласу емес, достасу жолдарын таңдаймыз", - деді Трамп.
Aбай-ақпарат
