Исмаилованың айтуынша, бұл әннің сөзін ақын Тахир Мұхаммад, ал әнін - сазгер Рустам Тулашов шығарған. Ән өткен жылы желтоқсан айында, Шавкат Мирзияев Өзбекстан президенті боп сайланғаннан соң жазылған. Әнші бұл әннің "жүрек қалауымен" жасалғанын айтты.

"Ақын Тахир Мұхаммад екеуміз біздің президент Шавкат-аканың жақсы істеріне қуанып, осы әнді жаза бастадық. Тахиржан әдемі сөздерін жазды, әнін - сазгер Рустам Тулашов шығарды. Ән желтоқсан айында дайын болды, ал қаңтарда - клип түсіріп, телеарналарға бердік", - деді Исмаилова.

Өзбекстан сазгерлер одағының мүшесі, музыкатанушы Равшанбек Матжоновтың айтуынша, Кәрімов кезінде мұндай мадақтау әндерін құптамаған, сол үшін әншілердің кейбірі жазаланған.

"Әртістерге мұндай ән орындап шығуға тыйым салынған. Кейбір әншілер, әрине, мадақтау әндерін айтып жүрді, бірақ оларды үлкен сахнаға жіберген жоқ", - деді Матжонов.

Абай-ақпарат