БТА банктің бұрынғы жетекшісі Мұхтар Әблязов 20 жылға бас бостандығынан айрылды.  Астана қаласындағы қылмысты істер жөніндегі  Алматы ауданаралық арнайы мамандандырылған соты оған осындай үкім кесті.

Сот үкімі бойынша Әблязовтың дүние-мүлкі тәркіленіп, 300 АЕК көлемінде айыппұл салынды. Сондай-ақ экс-банкир жазасын өтеп болған соң 3 жыл банк-қаржы қызметімен шұғылданбауы керек.

БТА банктің экс-төрағасы Сәдуақас Мәмеш те 5 жылға шартты түрде бас бостандығынан айрылды. Ол да 3 жыл өтпей өз кәсібімен айналыса алмайды.

БТА банк басқарамасы бастығының орынбасары – несие комитетінің төрағасы Жақсылық Жәрімбетов те 5 жыл шартты түрде бас бостандығынан айрылды.

Банктің несие жөніндегі директоры Қайрат Садықовтың дүние-мүлкі тәркіленіп, 15 жылға сотталды.

Айта кетейік, Мұхтар Әблязов сотқа қатысқан жоқ. Оның соттағы сөзін мемлекет тағайындаған қорғаушы сөйледі.

Абай-ақпарат