«Түркіменстанның балама жаңалықтары» басылымының хабарлауынша, желтоқсан айында көлік инспекторлары әйелдерге келесі жолы рөлге отырғанын көрсе, айыппұл төлейтінін ескерткен. Енді қаңтар айынан бастап басылымның дереккөзіне қарағанда, әйелдердің жүргізу куәлігін алып, көліктерін айыппұл тұрағына қоймақшы.

«Бастапқыда бұл ақпаратты қалжың ретінде қабылдадым. Бірақ өзімді көлік полициясы ұстады. Енді қазір әйелдер көлік жүргізуге қорқады. Оларды жұмыстан күйеулері алып кетіп жатыр», - дейді Ашхабад тұрғыны.

Дереккөзге қарағанда, 5 желтоқсанда ішкі істер министрі Исгендер Муликов мемлекет басшысына жол көлік оқиғасының дені әйел жүргізушілердің кесірінен болады деп есеп берген. Президент министрге «жағдайды түзе» деп тапсырма берген.

«Түркіменстанның балама жаңалықтары» басылымының дереккөзі жаңа тыйымдар тек көлік полициясындағы қордаланған проблемаларды жылы жабудың бір көрінісі дейді.

Abai.kz