Amnesty International Гуантанамо түрмесін сақтағаны үшін Трампты айыптады
Халықаралық Amnesty International адам құқығын қорғау ұйымы АҚШ президенті Дональд Трампты Гуантанамо түрмесін сақтап қалғаны үшін айыптады. Адам құқығын қорғаушылар бұны АҚШ-қа кір келтіретін әрекет деп есептейді.
Трамп "Елдегі жағдай туралы" Конгреске алғашқы жолдауында Гуантанамо туралы да сөз қозғады. Президент жүздеген қауіпті терроршыны бостандыққа шығару - ақымақтық деп есептейді. Құрама Штаттар мұндай айыптыларға қатысты саясатын қайта қарамайынша, түрме жабылмайды.
АҚШ президенті Барак Обама 2009 жылы бұл мекемені жабуға талпынған. Сол кезде қабылданған президент үкіміне сәйкес, түрмеде отырғандар елдеріне қайтарылуы немес АҚШ-тағы басқа түрмелерге ауыстырылуы тиіс еді.
Гуантанамодағы арнайы түрмені 2002 жылы АҚШ президенті Джордж Буш әкімшілігі салдырған. 2017 жылы арнайы түрмеде 41 адам отырды. Адам құқығын қорғаушылар Гуантанамо түрмесіндегілер азапталғаны туралы бірнеше мәрте мәлімдеген.
Abai.kz
