Беларусь президенті Александр Лукашенко Қазақстанға келеді. Көрші елдің көшбасшысы 24-25 қазан күндері елімізде ресми сапарда болады.

Бұл сапарында Беларусь басшысы Қазақстан Президенті Қасым-Жомарт Тоқаевпен кездеседі. Қос президент екі ел арасындағы сауда-экономикалық қарым-қатынастарды талқылап, қажетті келісімшарттарға қол қоймақ.

Нұр-Сұлтанда өтетін кездесуде Тоқаев пен Лукашенко өнеркәсіптік кооперацияны кеңейту, экономиканың түрлі салаларында, соның ішінде ауыл шаруашылығында, көлік пен логистикада, мұнай-химия кешенінде, жоғары технологиялар саласында ынтымақтастықты арттыру, интеграциялық бірлестіктер аясындағы және халықаралық алаңдардағы ынтымақтастықты, өңірлік және әлемдік күн тәртібін талқылайды.

Келіссөздер қорытындысы бойынша екі жақты келісімдер пакетіне қол қойылады. Сол күндері Нұр-Сұлтанда Қазақстан - Беларусь бизнес-форумы өтеді. Қазақстан астанасында Беларусь дипломатиялық миссиясы ғимараттарының жаңа кешенін ашу жоспарланған.

Abai.kz