قازاقستان مەن قىرعىزستان دەلەگاتسيالارىنىڭ اراسىندا وتكەن كەلىسسوزدەر قورىتىندىسى بويىنشا قاسىم-جومارت توقاەۆ پەن سوورونباي جەەنبەكوۆ بۇقارالىق اقپارات قۇرالدارى ءۇشىن بىرلەسكەن مالىمدەمە جاسادى. بۇل تۋرالى اقوردانىڭ ءباسپاسوز قىزمەتى جازدى.

قاسىم-جومارت توقاەۆ ءوزىنىڭ قىرعىزستانعا جاساعان ساپارىنىڭ ەرەكشە ماڭىزدىلىعىن اتاپ ءوتىپ، ەلدەرىمىزدى ەجەلدەن جالعاسىپ كەلە جاتقان تىعىز دوستىق بايلانىستارىمىز، تەرەڭ تامىرىمىز، ءتىلىمىز بەن مادەنيەتىمىز بىرىكتىرەتىنىن ايتتى.

قازاقستان پرەزيدەنتى ءوز سوزىندە وداقتاستىق ءارى ستراتەگيالىق سەرىكتەستىك دەڭگەيىنە جەتكەن ەكىجاقتى بايلانىستاردى دامىتۋعا تۇڭعىش پرەزيدەنتىمىز – ەلباسى نۇرسۇلتان نازارباەۆ پەن سوورونباي جەەنبەكوۆتىڭ  قوسقان ۇلەسىنە توقتالدى.

– نۇرسۇلتان نازارباەۆ پەن سوورونباي جەەنبەكوۆ  2017 جىلى ساياسي ەرىك-جىگەر تانىتىپ، ەكى ەل ءۇشىن دە ماڭىزدى سانالاتىن مەملەكەتتىك شەكارانىڭ قۇقىقتىق مارتەبەسىن بەكىتتى. بۇل قازاقستان مەن قىرعىزستاننىڭ بۇكىل الەم قوعامداستىعىنا تاتۋ كورشىلىك رۋحىنىڭ جارقىن ۇلگىسىن كورسەتتى، – دەدى قاسىم-جومارت توقاەۆ.

ول قازاقستاننىڭ پرەزيدەنتى رەتىندە كوپجاقتى قازاق-قىرعىز ىقپالداستىعىن دامىتا بەرۋگە نيەتتى ەكەنىنە نازار اۋداردى. ونىڭ ايتۋىنشا، بۇگىنگى كەلىسسوزدەر قورىتىندىسى بويىنشا قول قويىلعان بىرلەسكەن دەكلاراتسيا سونىڭ ايقىن دالەلى.

قاسىم-جومارت توقاەۆ كەلىسسوزدەر بارىسىندا ساۋدا-ەكونوميكالىق جانە ينۆەستيتسيالىق بايلانىستارعا باسا نازار اۋدارىلعانىن مالىمدەدى.

– 2015-2018 جىلدارى ەكىجاقتى تاۋار اينالىمى 30 پايىزعا ارتىپ، 900 ميلليون دوللارعا جۋىقتادى. سونىڭ ناتيجەسىندە ەلىمىز قىرعىزستاننىڭ جەتەكشى ساۋدا سەرىكتەسىنە اينالدى جانە رەسەي مەن قىتايدان كەيىنگى ءۇشىنشى ورىندى بەرىك يەلەنىپ وتىر. ءوز كەزەگىندە ورتالىق ازيا ەلدەرى ىشىندە قىرعىزستان – قازاقستاننىڭ ەكىنشى ساۋدا سەرىكتەسى، – دەدى قاسىم-جومارت توقاەۆ.

بۇل رەتتە، قازاقستان پرەزيدەنتى تاۋار اينالىمىن 1 ميلليارد دوللارعا جەتكىزۋ مىندەتىنە ايرىقشا توقتالدى. كەلىسسوزدەر بارىسىندا كاسىپكەرلەر تۇراقتى تۇردە تىكەلەي بايلانىس ورناتا الاتىن ارنايى الاڭ قۇرۋ باستاماسى تالقىلاندى.

– قازاقستان مەن قىرعىزستاننىڭ وڭىرارالىق فورۋمىن وتكىزۋ تاجىريبەسىن ەنگىزۋ وسىنىڭ ءبىر مىسالى بولا الادى. ۇكىمەتتەرگە بۇل ۇسىنىستى پىسىقتاۋ تاپسىرىلدى، – دەدى قاسىم-جومارت توقاەۆ.

قازاقستان پرەزيدەنتى ءوزارا ساۋدا-ساتتىقتىڭ شامامەن 50 پايىزىن قۇرايتىن شەكارا ماڭى ىنتىماقتاستىعىنىڭ قارقىندى دامىپ كەلە جاتقانىن اتاپ ءوتتى.

– ەكسپورت-يمپورت وپەراتسيالارىن قولداپ، ىنتالاندىرۋ ءۇشىن قازاقستان تاۋارلاردى راسىمدەۋ جانە دايىنداۋ جونىندەگى لوگيستيكالىق ورتالىق قۇرۋدى ۇسىنىپ وتىر. بۇل جوبانىڭ ىسكە اسىرىلۋى ەلدەرىمىزدىڭ اۋماعىندا اكىمشىلىك راسىمدەردى جەڭىلدەتىپ، تاۋارلاردى جىلجىتۋعا ايتارلىقتاي مۇمكىندىكتەر تۋعىزادى، – دەدى قاسىم-جومارت توقاەۆ.

سۋ جانە ەنەرگەتيكا سالاسىنداعى ماسەلە – كەزدەسۋدىڭ ماڭىزدى بولىگى. قازاقستان پرەزيدەنتى ورتالىق ازياداعى ترانسشەكارالىق وزەندەردەگى سۋ رەسۋرستارى ورتاق بايلىعىمىز دەپ سانايدى.

كەلىسسوزدەر بارىسىندا ەكى ەل باسشىلارى مادەني-گۋمانيتارلىق سالانى ودان ءارى دامىتۋدىڭ پەرسپەكتيۆالارىن جەكە ماسەلە رەتىندە قاراستىردى. اتاپ ايتقاندا، الداعى ۋاقىتتا ەلدەرىمىزدىڭ ءوزارا مادەني كۇندەرىن ۇيىمداستىرۋ ۇسىنىلدى. سوڭعى رەت مۇنداي شارا التى جىل بۇرىن وتكىزىلگەن بولاتىن.

قازاقستان پرەزيدەنتى كەلىسسوزدەر قورىتىندىسى بويىنشا قول قويىلعان ەكىجاقتى قۇجاتتارعا باسا ءمان بەرىپ، جالپى سيپاتى بويىنشا سەرىكتەستىگىمىزدى نىعايتۋعا تىڭ سەرپىن بەرەتىن ىنتىماقتاستىقتىڭ كەشەندى باعدارلاماسىنا ەرەكشە توقتالدى.

Abai.kz