اقش پرەزيدەنتى دونالد ترامقا حات

اسا مارتەبەلى دونالد مىرزا!

ءسىزدىڭ كەشە (28.11.2019) گونكونگتەگى «ادام قۇقىعىنىڭ بۇزىلۋىنا كىنالى» قىتاي جانە گونكونگتىڭ رەسمي تۇلعالارىنا سانكتسيا سالۋدى قاراستىراتىن زاڭ جوباسىنا قول قويعان اقپاراتتى وقىپ، قاتتى قۋاندىم.

اتالعان زاڭ جوباسىنىڭ قابىلدانۋى – جارتى جىلدان بەرى ادام قۇقىعى جانە دەموكراتيانى قورعاۋ جولىندا تىنباي كۇرەسكەن گونكونگ حالقى ءۇشىن زور قامقورلىق جانە ادىلەتتى شەشىم بولدى دەپ ەسەپتەيمىن. سونداي-اق، گونكونگتىڭ اۆتونوميالىق مارتەبەسىنىڭ ءوز دەڭگەيىندە ساقتالۋىنا دا ءوز ۇلەسىن قوسادى دەپ سەنەم!

ال، سوڭعى ءۇش جىلدان بەرى قىتايدىڭ شىڭجاڭ ولكەسىندەگى ۇيعىر، قازاق جانە قىرعىز قاتارلى از ساندى ۇلتتاردىڭ دا جاپپاي ساياسي قىسىمعا ۇشىراپ، كونتسلاگەرلەرگە ميلليونداپ قامالىپ جاتقانى تۋرالى ءسىزدىڭ جانە بۇكىل دۇنيەجۇزى حالقىنىڭ حاباردار ەكەنىن مەن جاقسى بىلەم.

قىتايدان قازاقستان رەسپۋبليكاسىنا قونىس اۋدارعان قازاقتار، «اتاجۇرت» ۇيىمى اتالعان گوناتسيدتىك جانىشتاۋ قيمىلىن الدە نەشە مارتە دالەلدەسە دە قىتاي ۇكىمەتى مويىنداماي كەلەدى.

بۇل از دەسەڭىز، اقش-تىڭ «New York Times» گازەتى جاريالاعان قىتايدىڭ شىڭجاڭداعى لاگەرلەرگە قاتىسى بار 400 بەتتەن اساتىن قۇپيا قۇجاتتى دا «فەيك» دەپ مالىمدەدى.

قازاقستان رەسپۋبليكاسىنىڭ سىرتقى ىستەر ءمينيسترى مۇحتار تىلەۋبەردى مىرزا 2019 جىلعى 4 قازانگدا قىتاي مالىمەتىنە سۇيەنىپ، «قىتايدا وقىتۋ ورتالىقتارىندا وتىرعان ەتنيكالىق قازاق جوق. بۇل اقپارات راستالدى» دەپ مالىمدەدى.

بىراق، 2019 جىلعى 19 قاراشادا جانە 27 قاراشادا «اقەدىل» جاستار شىعارماشىلىعىن قولداۋ قورى» قوعامدىق بىرلەستىگى ۇيىمداستىپ وتكىزىگەن ەكى رەتكى ءباسپاسوز جينالىسى بۇل اقپاراتتىڭ جالعان ەكەنىن تاعى دالەلدەدى. قايتا، جازىقسىز سوتتالعان، كونتسلاگەرلەردە قاماقتا وتىرعان جانە شەتەلگە شىعۋ قۇقىعى شەكتەلگەن ەتنيكالىق قازاقتاردىڭ ءتىپتى دە كوپ ەكەنىن انىقتاپ بەردى.

ەڭ وكىنىشتىسى، «اقەدىل» قوعامدىق بىرلەستىگى ۇيىمداستىرىلعان جينالىسقا ارنايى شاقىرىلعان قىتايدىڭ قازاقستانداعى توتەنشە جانە وكىلەتتى ەلشىسى چجان سياو "شىڭجاڭداعى لاگەرلەردە قازاقتار قاماۋدا وتىر" دەگەن وسى اقپاراتتى (https://www.azattyq.org/a/kazakhstan-china-ambassador/30295108.html ) جانە دە «جالعان» دەدى...

قىسقاسى، قىتاي بيلىگى بىرىككەن ۇلتتار ۇيىمى باس اسسامبلەياسىنىڭ رەزوليۋتسياسىمەن 1948 جىلعى 10 جەلتوقساندا № 217 ا (III) قابىلدانعان «ادام قۇقىقتارىنىڭ جالپىعا بىردەي دەكلاراتسياسىندا» كورسەتىلگەن مىندەتتەمەلەردى اياققا تاپتاپ وتىر.

ءوزىڭىز جاقسى بىلەسىز، قازاق – بەيبىتشىلىكتى سۇيەتىن ەڭ ادىلەتتى ۇلت. جاڭا عانا تاۋەلسىزدىگىن العان جاس مەملەكەتتىڭ پرەزيدەنتى نۇرسۇلتان نازارباەۆتىڭ ازامزاتقا اپات اكەلگەن سەمەي پوليگونىن جاۋىپ، جاپپاي قىرىپ-جوياتىن يادرولىق قارۋدان باس تارتۋى – سونىڭ ايقىن دالەلى!

ادامنىڭ قۇقىعى مەن بوستاندىعىن ەڭ باستى قۇندىلىق دەپ ەسەپتەيتىن الەمدەگى ەڭ ىقپالدى دەرجاۆا – اقش-تىڭ ەڭ ادىلەتتى پرەزيدەنتى رەتىندە سىزدەن شىڭجاڭداعى تۇركى تەكتەس از ساندى ۇلتتاردىڭ قۇقىعى مەن ەركىندىگىن قورعاۋعا باعىتتالعان تاعى ءبىر ارناۋلى زاڭ جوباسىن قابىلداۋىڭىزدى ءوتىنىپ سۇرايمىن!

ىزگى نيەتپەن،

اۋىت مۇقيبەك

Abai.kz