قازاقستان حالقىن يدەيا بىرىكتىرۋى ءتيىس. مىسالى، اقش-تا "امەريكا ارمانى" دەگەن مەنتاليتەت پەن سانا بار. قانشا پرەزيدەنت اۋىسسا دا قوعامنىڭ پرەزيدەنتكە قويار تالابى، ەلدى بىرىكتىرەر يدەياسى قالىپتاسقان. وباما كەتىپ ترامپ كەلدى. 40-تان استام پرەزيدەنت اۋىستى مەملەكەت تەك العا جىلجىپ كەلەدى. ادامزاتتىڭ وسى كۇنگە دەيىن تەحنولوگيادا، وركەنيەتتە، دەموكراتيادا جەتكەن جەتىستىگى سول ەلدە. مەملەكەتتى قۇرعاننان ەلدىڭ باسىندا ۆاشينگتون، دجەففەرسون، لينكولن سەكىلدى اقىلدى ازاماتتار وتىردى. ولار مەملەكەت قۇرعان العاشقى كەزەڭدەردەن حالىقتى ءوز ءيمميدجىنىڭ توڭىرەگىنە ەمەس، دۇرىس يدەيانىڭ باعىتىندا جولعا سالىپ، بىرىكتىرە ءبىلدى. ءبىر نەمەسە ەكى مەرزىمنەن ارتىق وتىرماي ۋاقىتىندا كەتتى.

ەۆروپا شايقاتىلىپ، رەۆاليۋتسيا جاساپ بارىپ سول جولعا ءتۇستى. فرانتسيا بيلىگىن نەشە رەت اۋىستىرىپ، بەسىنشى رەسپۋبليكاسىن قۇرعاندا بارىپ توقتادى.

ءبىز ۋكراينا، گرۋزيا سىندى قايتا-قايتا توڭكەرىس بولىپ، تىعىرىققا تىرەلمەۋ ءۇشىن يدەيانىڭ توڭىرەگىندە بىرىگۋىمىز قاجەت. بولاشاق پرەزيدەنت سايلاۋالدى پروگرامماسىن جازىپ ءبىزدى سوڭىنان ەرتپەسىن. ءبىز ول پرەزيدەنتتەن قازاقستان قوعامى مويىنداعان يدەيانىڭ توڭىرەگىندە پروگرامما جازۋدى، سول يدەياعا ساي بولۋدى تالاپ ەتۋىمىز قاجەت. سوندا اداسپايمىز. ليدەر ساتىلۋى، اداسۋى مۇمكىن. ال، ەلدى بىرىكتىرگەن يدەيا اداسپايدى. سەبەبى ول حالىقتىڭ ىشىنەن قايناپ شىعىپ، ۇلتتىڭ بويىنا سىڭگەن قۇندىلىق.

مەنىڭ ويىمشا ءبىزدى بىرىكتىرەتىن يدەيالار:

1. ادام قۇقىعى قورعالعان، ءسوز بوستاندى مويىندالعان مەملەكەت قۇرۋ.

2. پرەزيدەنت يدول ەمەس. جالدامالى مەنەدجەر. تالاپقا ساي كەلمەسە كەلەسى سايلاۋدا اۋىستىرامىز دەگەن مەنتاليتەتتى قالىپتاستىرۋ.

3. باسەكەلى ساياسي جۇيە. ساياسي كوزقاراسى ءۇشىن ەشكىمدى قۋدالامايتىن ءپرينتسيپتى قالىپتاستىرعان باسقارۋ جۇيەسىن ورناتۋ.

4. جەكە مەنشىكتىڭ قورعالۋى.

5. ءىس جۇزىندە باسەكەلى ەكونوميكا ورناتۋ.

6. پرەزيدەنت نە شەنەۋنىكتەردىڭ تۋىسى، اعايىنى ساياساتقا ارالاسپايدى. ارالاسسا يمپيچمەنت ارقىلى وكىلەتتىگىن توقتاتۋ.

7. مەملەكەتشىلدىك.

ارى قاراي ءتىزىمدى وزدەرىڭىز تولىقتىرا بەرىڭىزدەر. يدەيا قوعامنىڭ ىشىنەن ءپىسىپ شىعۋى ءتيىس! 5-10 جىلدا بۇكىل قازاقستان قوعامىن وسى يدەيالاردىڭ توڭىرەگىندە بىرىكتىرەتىن قوعام قالىپتاستىرۋ ءبىزدىڭ بولاشاقتا ءجۇرىپ ءوتۋىمىز قاجەت جول.

باۋىرجان سەرىكبايدىڭ الەۋمەتتىك جەلىدەگى جازباسىنان

Abai.kz