ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋ ماقساتىندا اۋىل شارۋاشىلىعى مينيسترلىگى بىلتىر اتىراۋ، اقتوبە، باتىس قازاقستان، قوستاناي، پاۆلودار، سولتۇستىك قازاقستان، شىعىس قازاقستان جانە جامبىل وبلىستارىنىڭ رەسەي فەدەراتسياسىمەن جانە قىرعىز رەسپۋبليكاسىمەن شەكارالاس اۋماقتارىندا فيتوسانيتاريالىق باقىلاۋ پۋنكتتەرىن قۇرعان بولاتىن. ولاردىڭ قىزمەتكەرلەرى اۋىل شارۋاشىلىعى ونىمدەرىن اكەلۋ جانە اكەتۋ كەزىندە مەملەكەتتىك كارانتيندىك فيتوسانيتاريالىق جانە ۆەتەريناريالىق-سانيتاريالىق باقىلاۋ مەن قاداعالاۋدى جۇزەگە اسىرۋعا ءتيىستى.

الايدا، وتكەن جىلدىڭ اياعىندا قولعا الىنعان وسى جۇمىستىڭ ۇيىمداستىرىلۋى سىن كوتەرمەيدى. بۇعان ءبىز، ارىپتەسىم سەرگەي زۆولسكي ەكەۋمىز، جاقىندا قىزىلجار وڭىرىندە بولعانىمىزدا كوز جەتكىزدىك.

بىرىنشىدەن، مەملەكەتتىك شەكارا ماڭىندا قۇرىلعان فيتوسانيتاريالىق باقىلاۋ پۋنكتتەرى كەدەندىك جانە شەكارالىق باقىلاۋ پۋنكتتەرى ورنالاسقان عيماراتتاردا ەمەس، ولاردىڭ بەرگى جاعىنداعى جاقىن جەرگە اكەلىپ قويىلعان ۆاگونشالاردا ورنالاستىرىلعان. مۇنىڭ ءوزى ءبىر مەزگىلدە تەكسەرىس جۇرگىزۋگە مۇلدەم قولايسىز بولىپ شىقتى. سەبەبى كەدەندىك جانە شەكارالىق باقىلاۋدان وتكەن اۆتوكولىكتەر وسىمدىكتەر كارانتينى جونىندەگى ينسپەكتورلاردىڭ تالاپ ەتكەندەرىنە قاراماستان، كوبىنەسە توقتاماي، ەلدىڭ ىشىنە قاراي وتە شىعادى. سوندىقتان مىندەتتى تۇردە تەكسەرىلۋگە ءتيىستى ءونىم تاسىمالداۋشى اۆتوكولىك يەلەرى تۋرالى جول-پوليتسياسىنىڭ قىزمەتكەرلەرىنە حابارلاپ، ىزدەتىپ، كەيىن قايتارۋعا تۋرا كەلەدى. بۇل كورشى ەلدەردەن اۋىل شارۋاشىلىعى ونىمدەرىن اكەلگەن اۆتوكولىك جۇرگىزۋشىلەرى ءۇشىن دە ءتيىمسىز. ويتكەنى، ولار قوسىمشا ۋاقىت جانە جانارماي شىعىنداۋعا ءماجبۇر. ولار ءبىر كەزدە كەدەندىك، شەكارالىق جانە فيتوسانيتاريالىق باقىلاۋ ءبىر عيماراتتا، بىرلەسە جۇرگىزىلگەندىگىن ايتىپ شاعىنادى.

ەكىنشىدەن، ۇلتتىق قاۋىپسىزدىك كوميتەتى شەكارا قىزمەتىنىڭ لاۋازىمدى ادامدارى فيتوسانيتاريالىق باقىلاۋ پۋنكتىنىڭ قىزمەتكەرلەرىن مەملەكەتتىك شەكارا ارقىلى وتكىزۋ پۋنكتىنە اۋىل شارۋاشىلىعى ونىمدەرى بار كولىك قۇرالدارىنىڭ كەلگەنى تۋرالى ۋاقتىلى جانە تولىق حاباردار ەتە بەرمەيدى.
ۇشىنشىدەن، اۋىل شارۋاشىلىعى مينيسترلىگى فيتوسانيتاريالىق باقىلاۋ پۋنكتتەرىن اشۋ ءۇشىن ساتىپ العان ۆاگونشالار سولتۇستىك وڭىرلەردىڭ قاتال كليماتىنا ارنالماعان بولىپ شىقتى. مىسالى، وسىنداي ۆاگونشادا توڭىپ-جاۋراعان سولتۇستىك قازاقستان وبلىسىنىڭ اۋماعىنداعى قاراقوعا فيتوسانيتاريالىق باقىلاۋ پۋنكتىنىڭ قىزمەتكەرلەرى بوس تۇرعان باسقا ءبىر شاعىن عيماراتتى قالپىنا كەلتىرىپ، سونى پانالاۋعا ءماجبۇر بولىپتى.
وسىعان وراي بۇگىن پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆقا دەپۋتاتتىق ساۋال جولداپ، مىناداي ۇسىنىستاردى ەنگىزدىك:

بىرىنشىدەن، مەملەكەتتىك شەكارادا قۇرىلعان فيتوسانيتاريالىق باقىلاۋ پۋنكتتەرىن كەدەندىك جانە شەكارالىق باقىلاۋ پۋنكتتەرىنىڭ عيماراتتارىنا ورنالاستىرۋ مۇمكىندىگىن قاراستىرۋ قاجەت;

ەكىنشىدەن، كەدەندىك، شەكارالىق باقىلاۋ پۋنكتتەرىنىڭ جانە فيتوسانيتاريالىق باقىلاۋ پۋنكتتەرى قىزمەتكەرلەرىنىڭ ءوزارا ءىس-قيمىلىن بارىنشا ۇيلەستىرۋ كەرەك.

ايتپەسە، ەلدىڭ شەتىندەگى، جەلدىڭ وتىندەگى شەكارادا وگەيدىڭ كۇيىن كەشكەن فيتوسانيتاريالىق باقىلاۋ پۋنكتتەرىنىڭ قىزمەتكەرلەرىنىڭ جۇمىسىنان ماردىمدى ناتيجە كۇتۋ قيىن.

كارىباي مۇسىرماننىڭ الەۋمەتتىك جەلىدەگى جازباسىنان

Abai.kz