رەداكتسيادان: رەداكتسيامىزدىڭ ەلەكتروندى پوشتاسىنا ۋرازباەۆ كوپتلەۋ اتتى تاعى ءبىر قانداسىمىزدىڭ حاتى كەلىپ ءتۇستى. بۇل – وسى ماسەلە بويىنشا ءۇشىنشى حات.

اتالعان حات تا «ورالمان» ساناتىمەن باسپانا كەزەگىنە تۇرىپ، قازاقستان ازاماتتىعىن العان سوڭ كەزەكتەن شىعارىلىپ تاستالعان قانداسىمىزدىڭ تاعدىرى جايلى ەكەن. 

ءسويتىپ، پرەزيدەنتتىڭ اتىنا حات جازۋعا ءماجبۇر بولىپتى.

30 جەلتوقسان، 2019 جىلى «Abai.kz» سايتىندا اقىن، قوعام قايراتكەرى اۋىت مۇقيبەكتىڭ پرەزيدەنت قاسىم-جومارت توقاەۆتىڭ اتىنا جازعان «قانداستارىڭىزدى باسپاناسىز تاستاماڭىز...» اتتى «اشىق حاتى» جاريالانىن تاعى دا ەستەرىڭىزگە سالا وتىرىپ، بۇل حاتتى دا جاريالاۋدى ءجون كوردىك.

قازاقستان  رەسپۋبليكاسىنىڭ 
پرەزيدەنتى ق.ك.توقاەۆقا

اسا قۇرمەتتى قاسىم-جومارت كەمەلۇلى!

مەن 2007 جىلى وزبەكستان رەسپۋبليكاسىنان كوشىپ  كەلىپ، قازاقستان رەسپۋبليكاسىنىڭ ازاماتتىعىن الدىم. وتباسىمىزدا ءۇش بالام، ايەلىم  – بەس جانبىز. جاسىم بيىل 56-دا. بالالارىم قولىمدا. 

«ورالماندار» ساناتى بويىنشا بەس جان بولىپ، 2010 جىلعى 30 ساۋىردە  نۇر-سۇلتان قالاسىنا باسپانا كەزەگىنە تۇردىم. قازاقستان رەسپۋبليكاسىنىڭ ازاماتتىعىن العاندىعىم سەبەپتى، 2019 جىلى باسپانا كەزەگىنەن شىعارىلىپ تاستالدىم.

ءسويتىپ، ون ەكى جىلدان استام كۇتكەن كەزەگىمنەن  ايىرىلدىم!

ەلگە ورالعان ون ءۇش ءۇش جىلدان بەرى ءوزىمدى ءوزىم جۇمىسپەن قامتىپ، جان باعىپ كەلەم. قازىر  قالادا كۇزەتشى بولى، وتباسىمدى اسىراۋدامىن. ايەلىم دە قارا جۇمىسپەن ماردىمسىز تابىس تاپقان بولىپ ءجۇر.

ەكى بالام جوو-دا، ءبىر بالام مەتەپتە وقىپ جاتىر. 

قازاقستانىما، ونى قۇرعان ەلباسىما جانە ەل باسقارىپ وتىرعان سىزگە ءدان ريزامىز. وتباسىمىزبەن تىلەۋىڭىزدى تىلەپ وتىرامىز. امان بولىڭىزدار! 

تابىسىمىز از بولعاندىقتان، باسقا باعدارلامالارعا قاتىسا المادىق. ونىڭ ۇستىنە پاتەر جالداپ، بالالاردى وقىتىپ جۇرگەندىكتەن اقشا دا جيا المادىق. بار سەنگەنىمىز – وسى باسپانا كەزەگى ەدى.

اسا قۇرمەتتى قاسىم-جومارت كەمەلۇلى!

جاسى ۇلعايعان، ونىڭ ار جاعىندا شەتتەن ورالعان ءبىز سەكىلدى ادامدى دۇرىس جالاقىسى بار جەرگە ەشكىم جۇمىسقا المايدى ەكەن.

سوندىقتان، سىزدەن  «ورالمان» ساناتىمەن باسپانا كەزەگىنە تۇرىپ، ازاماتتىق العان سوڭ شىعارىلىپ تاستالعان مەنى جانە مەن سەكىلدى قانداستارىڭىزدىڭ ماسەلەسىن ءوز نازارىڭىزعا الىپ، قاتىستى زاڭنامالارعا تولىقتىرۋ ەنگىزۋگە، قۇقىعىمىزدى قالپىنا كەلتىرۋگە كومەكتەسۋىڭىزدى سۇرايمىن.

زور قۇرمەتپەن،

ۋرازباەۆ كوپتلەۋ 

Abai.kz