كەشە، 7 اقپان كەشقۇرىم جامبىل وبلىسى، قورداي اۋدانىنا قاراستى ماسانشى اۋىلىندا جەرگىلىكتى تۇرعىندار اراسىندا جانجال شىقتى دەگەن اقپارات الەۋمەتتىك جەلىگە تارادى.

بۇگىن وسى وقيعاعا بايلانىستى ورتالىق كوممۋنيكاتسيا قىزمەتىندە وتكەن ءباسپاسوز ءماسليحاتىندا ءىىم ەرلان تۇرعىمباەۆ جانجالدىڭ جاي جاپسارىن ءتۇسىندىردى. ءمينيستردىڭ ايتۋىنشا، توبەلەستەن سەگىز ادام قازا بولىپ، 40 ادام ءارتۇرلى دەڭگەيدە جاراقات العان.

وسى وقيعاعا بايلانىستى «بۇزاقىلىق» جانە «كىسى ءولتىرۋ» باپتارىمەن ءىس قوزعالعان. ازىرگە انىقتالعان دەرەكتەرگە قاراعاندا، قازاق-دۇنگەن قاقتىعىسىندا 30-دان استام تۇرعىن ءۇي، 15 ساۋدا دۇكەنى، 23 اۆتوكولىك ورتەنگەن. وپەراتيۆتى توپتىڭ جۇمىسى ناتيجەسىندە، 47 كۇدىكتى ۇستالىپ، ونىڭ ەكەۋىنەن قارۋ قۇرالى تاركىلەنىپتى. ءتارتىپتى باقىلاۋ ماقساتىندا ايماقتا پوليتسيا قىزمەتكەرلەرى مەن ۇلتتىق ۇلان جۇمىلدىرىلعان.

– ارانداتۋشىلار مەن كۋاگەرلەر جانجالدى ۆيدەوعا ءتۇسىرىپ، الەۋمەتتىك جەلىدە تاراتقان. سونىمەن قاتار ازاماتتاردى قۇقىققا قايشى ارەكەتتەرگە شاقىرعان. وسىدان كەيىن جانجال ورنىنا ءارتۇرلى كورشىلەس ەلدى مەكەندەردەن 300 ادام كەلگەن. بۇزاقىلار ءبىر-بىرىنە تاس لاقتىرعان. مەتالل زاتتار قولدانعان. سونداي-اق، قارۋ قولدانعان، - دەيدى ەرلان تۇرعىمباەۆ.

اقپارات ءمينيسترى داۋرەن اباەۆ «اقپارات تاراتۋدا اباي بولۋعا» شاقىرىپ، «ءبىر اۋىلدا تۇرمىستىق داۋدان تۋعان كونفليكتىنىڭ ءورشىپ كەتۋىن» ۇلتارازدىق اقپارات تاراتۋشى ارانداتۋشىلاردان كورەدى.

– بەردىبەك ساپارباەۆ باستاعان كوميسسيا قازىر قورداي اۋدانىنا بارا جاتىر. ءبىز قازىر قازاقستان حالقى اسسامبلەياسى وكىلدەرىن، جەرگىلىكتى اقساقالدار مەن قوعام قايراتكەرلەرىن، يمامداردى تارتا وتىرىپ، حالىقتى سابىرعا شاقىرامىز. قازىر الاڭدايتىن، ەلدى دۇرلىكتىرەتىن نەگىز جوق، – دەدى اباەۆ.

سونىمەن قاتار، جاۋاپتى قىزمەتكەرلەر وقيعاعا قاتىستى جالعان اقپارات تارتۋشىلار قاتاڭ جاۋاپقا تارتىلىپ، جازاسىز قالمايتىنىن ەسكەرتتى.

وسى جانجالعا بايلانىستى اقوردانىڭ رەسمي سايتىندا ەل پرەزيدەنتىنىڭ ۇندەۋى جاريالاندى.

«بۇل احۋالدى ارانداتۋشىلار ءوز ماقساتىنا پايدالاندى. وكىنىشكە قاراي، بۇل وقيعا كەزىندە ادام شىعىنى بولدى. مەن قازا بولعان ازاماتتاردىڭ وتباسىلارىنا كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەسپىن. ...جامبىل وبلىسى اكىمىمەن بىرلەسىپ، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارىن ۇيىمداستىرادى. سونداي-اق، جاعدايدى تۇراقتاندىرۋمەن اينالىسادى. قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىن بولادى. مەملەكەتىمىزدىڭ مۇددەسىنە زيان كەلتىرەتىن، بەرەكە-بىرلىگىمىزدى بۇزاتىن جانە جالعان اقپارات تاراتقان ازاماتتار زاڭ الدىندا جاۋاپ بەرەدى»، – دەدى مەملەكەت بارسشىسى.

"بۇل جانجال دا بۇرىنعىداي ەلدەگى وزگە دياسپورا وكىلدەرىنىڭ زاڭعا باعىنباي تارتىپسىزككە جول بەرگەنىنەن بولىپ وتىر. وسى كۇنگە دەيىن قازاقتار جينالىپ، وزگە ۇلت وكىلىنە كۇش كورسەتىپتى دەگەندى ەسىپ كورمەدىك. قايتا وسىنداي قاقتىعىستىڭ ءبارى، وزگە دياسپورا وكىلدەرىنىڭ زاڭسىز ارەكەتتەرىنەن كەيىن تۋىنداپ جاتادى" - دەيدى وسى وقيعاعا قاتىستى پىكىر بىلدىرۋشىلەر.

اقپارات قۇرالدارىنداعى مالىمەتتەرگە سۇيەنسەك، بۇل جولى دا قورداي اۋدانىندا الدەبىر ازاماتتار پوليتسەيگە باعىنباي، ءتىپتى ولارعا قول جۇمساعان كورىنەدى. ال بۇل ازاماتتار سول اۋدانداعى ەتنيكالىق دۇنگەندەر ەكەن. الەۋمەتتىك جەلىدە تاراعان وسى وقيعانىڭ ۆيدەوجازباسى جەرگىلىكتى تۇرعىنداردىڭ اشۋ-ىزاسىن تۋدىرىپ، جاپپاي توبەلەستىڭ تۋىنداۋىنا سەبەپ بولعان بولۋى مۇمكىن. جەرگىلىكتى پوليتسيا دا جانجالدىڭ شىعۋ سەبەبىن ءتارتىپ ساقشىسى مەن تۇرعىنداردىڭ ءبىرىنىڭ اراسىندا بولعان كيكىلجىڭمەن بايلانىستىرعان.