ەكىباستۇزدىق پەداگوگتارعا، سونىڭ ىشىندە اسىرەسە قازاق مەكتەپتەرىنىڭ مۇعالىمدەرىنە تامىز، قىركۇيەك ايلارىنان بەرى زەينەتاقى تولەمدەرى دۇرىس جۇرگىزىلمەي كەلەدى. قۇزىرلى ورگاندار ەسەبىنشە، ەكىباستۇز قالالىق ءبىلىم ءبولىمىنىڭ ءوز قاراماعىنداعى مۇعالىمدەر الدىنداعى ءتۇرلى قارىزى (جالاقى، ءىسساپار شىعىندارى، تاعى باسقا) وقۋ جىلىنىڭ باسىنان ساناعاندا 120 ميلليون تەڭگەگە جەتىپ جىعىلىپتى. 

مۇعالىمدەر قاۋىمى جالاقىنىڭ ءبىر ايدا ەكىگە، ۇشكە ءبولىنىپ جانە ءار ءتۇرلى كولەمدە بەرىلىپ جۇرگەنىنە تاڭعالا قاراعانىمەن، زەينەتاقى اۋدارىمدارىنىڭ مۇلدەم تولەنبەي جۇرگەنىنەن حابارسىز بولىپ كەلگەن. تەك بانككە نەسيە الۋعا بارعاندارىندا زەينەتاقى شوتتارىنىڭ سوڭعى ايلاردا قاڭىراپ تۇرعانى اشكەرە بولىپتى. مۇنداي جايتتى №18 جالپى ورتا ءبىلىم بەرەتىن مەكتەپ مۇعالىمدەرى دە باستان كەشكەن. ولار بۇل زاڭسىزدىققا شىداماي، توپتاسىپ قالالىق پروكۋراتۋراعا جانە ءبىلىم ءبولىمىنىڭ كاسىپوداق كوميتەتىنە شاعىمدانىپتى. «جىلاماعان بالاعا ەمشەك بەرمەيدى» دەگەن قازاق ماقالىنىڭ ءبىلىم سالاسىندا اسا وزەكتىلىگىن كىم بىلگەن! قازىرگى ۋاقىتتا شۋ شىعارعان مۇعالىمدەردىڭ تولەمدەرى ءبىراز تۇگەندەلىپ قالعانعا ۇقسايدى. 

«باسشىمىزدى پروكۋراتۋرا شاقىردى، بارعانىمىزدا «مەكتەپ بۋحگالتەرى دە، ءبىلىم ءبولىمى دە بۇل ماسەلەگە كىنالى ەمەس، ايىپتى جەرگىلىكتى اكىمدىك ەكەن»، - دەگەن ءۋاج ايتىلدى. ءبىلىم ءبولىمىنىڭ ماماندارى شاعىمدى الەۋمەتتىك جەلىگە شىعارماۋىمىزدى، شۋلاتپاۋىمىزدى ءوتىندى»، - دەيدى ۇستازدار. 

ال 6 اقپان كۇنى ەكىباستۇز مەكتەپتەرىنە تۇگەل تەلەفونوگرامما تارادى. وندا بىلاي دەپ جازىلىپتى: «وبلىس اكىمىنىڭ قازاقستان رەسپۋبليكاسى ءبىلىم جانە عىلىم مينيسترلىگىنىڭ 2020 جىلعى 31 قاڭتارداعى №3-10-2/289 – ي حاتىنا سايكەس بەرگەن تاپسىرماسىنا وراي، ءبىلىم قىزمەتكەرلەرىنە قاڭتار ايى ءۇشىن 10 اقپانعا دەيىن 25 پايىزدىق كوتەرمەاقى تولەنسىن. جالاقىنىڭ تولەنگەنى تۋرالى اقپارات 8 اقپانعا دەيىن حابارلانسىن. باسقارما باسشىسىنىڭ ورىنباسارى س.الەكپاروۆا». وسى حاتتاعى ءسۇيىنشى حابار مۇعالىمدەرگە زەينەتاقى كەلەڭسىزدىكتەرىن ءبىراز ۇمىتتىرىپ جىبەرگەندەي بولدى. بىراق جايباسار ءبىلىم ءبولىمى 10 اقپانعا دەيىن مۇنى ورىنداپ ۇلگەرسە جاقسى عوي...

جالپى، ەكىباستۇزدىڭ ءبىلىم مەكەمەلەرىندە زەينەتاقى اۋدارىمدارى عانا ەمەس، ءىسساپار شىعىندارىن تولەۋ جايى دا تۇسىنىكسىز، جۇيەسىز ەكەن. نەگە ولاي ەكەنىن قاراپايىم مۇعالىمدەر ۇقپاي دال. 

وسىنىڭ ءبارى ەكىباستۇز قالاسى اكىمىنىڭ الەۋمەتتىك ماسەلەلەر جونىندەگى ورىنباسارى ناتاليا نەفەدوۆا مەن ءبىلىم ءبولىمى كاسىپوداق كوميتەتىنىڭ ءتورايىمى ءاليما راحىمجانوۆا ءۇشىن تاڭسىق جايت ەمەستىگىن مۇعالىمدەردەن بىلدىك. الايدا اكىم ورىنباسارى ماسەلەنى شەشۋ جولدارىن ىزدەۋگە اسىقپاي، كەمشىلىكتى جاسىرىن ۇستاۋعا تىرىسىپ ابىگەر. 

وتكەن جىلدىڭ جەلتوقسان ايىندا وبلىستان كەلگەن اۋديت ءبىلىم ءبولىمىنىڭ استان-كەستەڭىن شىعارىپ تەكسەرىپ، اۋقىمدى قارجىلىق كەمشىلىكتەر تاپقان بولاتىن. سونىڭ ناتيجەسىندە تەكسەرۋشىلەر قالا اكىمىنە «ءبىلىم ءبولىمىنىڭ باسشىسى ج.حامزاباەۆانىڭ جاۋاپكەرشىلىگىن قاراستىرۋدى» قورىتىندى انىقتاماعا باتتيتا جازىپ كەتكەنىمەن، وزگەرىس از. ەلدىڭ ايتۋىنشا، قالا اكىمى ەرجان يمانزايپوۆ حامزاباەۆانىڭ شاكىرتى ەكەن-مىس. بولسا بولسىن، بىراق قاراپايىم مۇعالىم قاۋىمنىڭ ءوز زەينەتاقىسىنا مەرزىمىندە قول جەتكىزە المايتىنداي نە جازىعى بار ەدى؟! 

اسلان شايقىۇلى،

پاۆلودار وبلىسى

قوسىمشا: Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر الماستىرۋعا اركىم قۇقىلى. جوعارىداعى سپيكەردىڭ پىكىرى رەداكتسيا ۇستانىمىن بىلدىرمەيدى. الداعى ۋاقىتتا ماقالادا ەسىم-سويلارى اتالعان جەكەلەگەن ازاماتتار رەداكتسيامىزعا جاۋاپ بەرۋگە نيەتتى بولسا، ولاردىڭ دا پىكىرىن بەرۋگە ءازىرمىز. 

Abai.kz