بۇگىن قازاق تەلەۆيزياسىنىڭ تۇڭعىش ديكتورى زۇلقيا جۇماتوۆا 100 جاسقا تولدى. قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ «قازاق ديكتورلارىنىڭ اناسى» اتانعان زۇلقيا مۇقانقىزىن عاسىرلىق مەرەيتويىمەن قۇتتىقتادى.

«ءسىزدى عاسىرلىق بەلەسىڭىز – 100 جاسقا تولعان تورقالى تويىڭىزبەن شىن جۇرەكتەن قۇتتىقتايمىن! ءسىز وتاندىق كوگىلدىر ەكراندا تۇڭعىش رەت قازاق تىلىندە ەفيرگە شىققان قازاق تەلەۆيزياسىنىڭ قارلىعاشىسىز. كوزى قاراقتى كورەرمەن 1958 جىلعى 8 ناۋرىزدا العاش رەت ءسىزدىڭ «كەش جارىق» دەگەن ءسوزىڭىز ارقىلى انا ءتىلىمىزدىڭ اسقاق ءۇنىن ەستىدى.

تاريح بەتتەرىندە قاتتالعان سول كەزەڭنەن بەرى ۇزاق جىلدار قازاق تەلەۆيزياسىندا ابىرويمەن قىزمەت اتقارىپ، سوڭعى جاڭالىقتار مەن كوركەم شىعارمالاردى، ەل باسشىلىعىنىڭ ۇندەۋلەرىن حالىققا ۇزدىكسىز جەتكىزىپ وتىردىڭىز.

ءار جىلدارى شىعارماشىلىقپەن اينالىسىپ، بالالار ادەبيەتىنىڭ التىن قورىن تولىقتىرۋعا ۇلەس قوستىڭىز.

مەرەيتويىڭىزبەن قۇتتىقتاي وتىرىپ، سىزگە مىقتى دەنساۋلىق، سارقىلماس كۇش-قۋات تىلەيمىن!»، - دەلىنگەن مەملەكەتتىك حاتشىنىڭ قۇتتىقتاۋ حاتىندا.

زۇلقيا مۇقانقىزى 1920 جىلدىڭ 20 اقپانىندا پاۆلودار وبلىسىنىڭ باياناۋىل اۋدانىندا دۇنيەگە كەلگەن. الماتى تەلەستۋدياسى اشىلعان 1958 جىلى ديكتورلىققا جاريالانعان كونكۋرسقا قاتىسىپ، 750 ادامنىڭ اراسىنان ۇزدىك شىعادى.

«مادەنيەت مينيسترلىگىنىڭ وكىلدەرى باستاعان كوميسسيا 20 كىسىدەن تۇردى. ولار اقىلداسىپ بولعان سوڭ، «ءسىز ءبىراۋىزدان وتەسىز» دەدى. ارتىنان بىلگەنىمدەي، باعانادان بەرى مەنىمەن تىلدەسكەن شاكەن ايمانوۆ ەكەن. قاسىما كەلىپ ريزاشىلىعىن ءبىلدىردى. سول كەزدە 1 ورىنعا 750 ادام ۇمىتكەر بولىپتى. ءدال وسىلايشا، قازاق تەلەديدارىنداعى تۇڭعىش ديكتور بولۋ باقىتى مەنىڭ ماڭدايىما بۇيىردى»،- دەپ ەسكە الادى ز.مۇقانوۆا.

سول جىلى ماسكەۋدە وتكەن قازاق ادەبيەتى مەن ونەرىنىڭ ونكۇندىگىندە تەلەحابارلار مەن جاڭالىقتاردىڭ جۇرگىزۋشىسى رەتىندە قاتىسىپ، يۋري لەۆيتان، نينا كوندراتوۆا سياقتى بۇكىل وداققا تانىمال ديكتورلارمەن قاتار ديكتورلىق ونەردىڭ قۇپياسىمەن تانىسادى. زۇلقيا جۇماتقىزى قارا شاڭىراقتا 1958 جىلدان 1970 جىلعا دەيىن قىزمەت ەتتى.

«قازاقستان» رەسپۋبليكالىق تەلەراديوكورپاراتسياسى زۇلقيا مۇقانقىزىنىڭ قاتىسۋىمەن الماتى ستۋدياسىندا ارنايى حابار تۇسىرەدى. «ءبىر عۇمىر – ءبىر عاسىر» جوباسى «Qazaqstan» تەلەارناسىنىڭ ەفيرىنەن 8 ناۋرىز قارساڭىندا كورسەتىلەدى

Abai.kz