ارمەنيا مەن قىرعىزستاننان كولىك العان جۇرگىزۋشىلەر وزدەرىن ءماجىلىس توراعاسى نىعماتۋللين جاقتاپ وتىرعانىن ايتىپ، ماسەلەنى سول شەشە الار دەپ ۇمىتتەنەدى. حاتقا قول قويعان ونداعان ادام شەتەلدىك كولىك يەلەرىنە سالماق سالماۋدى، بارىنە بىردەي امنيستيا جاريالاۋدى سۇرادى.

- اكەلىنگەن ماشينالاردىڭ قۇنىنان كوپ ميلليونداعان تولەمدەردى كىم ويلاپ شىعاردى؟ ول ەسەپتەر قايدان الىنعان؟ حالىقتىڭ ونى تولەۋگە شاماسى جوق. ايلىق كولەمى بەرىلەتىن ستاتيستيكاعا مۇلدەم ساي كەلمەيدى. حالىق تالاباسى وسىنداي - وسى جىلدىڭ 1 اقپانىنا دەيىن اكىلىنگەن بارلىق كولىكتەردى لەگاليزاتسيالاۋ ارقىلى تولىق قازاقستاندىق تىركەۋگە تەگىن قويۋ، - دەدى جينالعانداردىڭ ءبىرى تالعات تىلەۋبەكوۆ.

جۇرگىزۋشىلەر بيلىكتىڭ ۋاقىتشا تىركەۋ شاراسى مەن شەتەلىك كولىكتەرگە سارى ءنومىر بەرۋگە قارسى. جينالعانداردى پوليتسيا مەن اكىمدىك وكىلدەرى باقىلاپ تۇردى. اكىمدىك اكتسيانىڭ زاڭسىز ەكەنىن ايتىپ، جۇرتتى تاراۋعا شاقىردى.

ىشكى ىستەر مينيسترلىگى بيىل قاڭتاردا "قازاقستان اۋماعىنا كىرگەن ارمەنيا، قىرعىزستان مەن رەسەيدىڭ تىركەۋ ءنومىرى بار كولىكتەردى زاڭعا ساي تىركەۋ كەرەگىن" مالىمدەدى. مينيسترلىك شەتەلدەن كولىك العاندارعا باستاپقى الىمدى، ۋتيليزاتسيا الىمىن جانە باج سالىعىن تولەپ، اۆتوماشينالارىن تىركەۋدى ۇسىندى. ۇكىمەت شەتەلدىك كولىگىن تىركەگىسى كەلمەگەندەرگە اۆتوماشيناسىن قازاقستاننان وتىز كۇنگە شىعارىپ، كەيىن ەلگە قايتا كىرگىزۋدى نەمەسە شەتەلدەن العان كولىكتى شەتكە قايتا اپارىپ ساتۋدى ۇسىنادى.

بۇل ارمەنيا، قىرعىزستان مەن رەسەيدەن كولىك العانداردىڭ جاپپاي نارازىلىعىنا تۇرتكى بولدى. قاڭتار ايىنىڭ ورتاسىنان باستاپ اقتاۋ، اقتوبە، الماتى، اتىراۋ، جاڭاوزەن، ورال، پەتروپاۆل جانە سەمەي قالالارىندا اۆتوجۇرگىزۋشىلەر جينالىپ، كولىكتى تىركەۋدىڭ شىعىنى تىم كوپ ەكەنىن ايتىپ، ۇكىمەتتەن اۆتوماشينالارىن جەڭىلدىكپەن ءارى ارزان جولمەن تىركەۋگە مۇمكىندىك بەرۋدى تالاپ ەتتى. ولار تۇراقتى تىركەۋ قۇنى كولىك باعاسىنان اسىپ كەتەتىنىن ايتىپ، تىركەۋدى جەڭىلدەتۋدى سۇراپ كەلەدى.

بيلىك قازاقستاندا تىركەلمەگەن شەتەلدىك كولىكتەر زاڭ بۇزسا، جازادان قۇتىلىپ كەتەدى دەپ سانايدى.

جۇرگىزۋشىلەر نارازىلىعىنان سوڭ قازاقستان پرەزيدەنتى قاسىم-جومارت توقاەۆ شەتەلدىك ءنومىرى بار كولىكتەردى 2021 جىلدىڭ ناۋرىزىنا دەيىن ۋاقىتشا تىركەۋگە قويۋدى تاپسىردى. ۋاقىتشا تىركەلگەن كولىكتەرگە سارى ءتۇستى ءنومىر بەرىلەدى. بىراق شەتەلدەن اۆتوموبيل اكەلگەندەر 2021 جىلدىڭ ناۋرىزىنا دەيىن باستاپقى الىمدى، ۋتيليزاتسيا الىمىن (ۋتيليزاتسيا – كولىك ەسكىرگەندە يەسىنەن الىپ، جويۋ) تولەپ، كولىگىن تۇراقتى تىركەۋگە قويۋى ءتيىس. جۇرگىزۋشىلەر ۋتيليزاتسيا الىمى تىم قىمبات دەيدى. ەكولوگيا زاڭىنا سايكەس، ۋتيليزاتسيا الىمى جەڭىل كولىكتەرگە 900 مىڭ تەڭگەدەن 3 ميلليون تەڭگەگە دەيىن، ال جۇك كولىكتەرىنە 20 ميلليون تەڭگەگە دەيىن جەتەدى.

ءماجىلىس توراعاسى نۇرلان نىعماتۋللين اقپاننىڭ باسىندا ءماجىلىس وتىرىسىندا "ۇكىمەت شەتەلدىك كولىكتەرگە قاتىستى دۇرىس جۇمىس ىستەمەدى، سونىڭ سالدارىنان حالىق زارداپ شەگىپ جاتىر. جۇمىس ىستەي المايتىندار ورنىن بوساتسىن" دەپ سىناعان.

Abai.kz