قىزىلوردا وبلىسىنىڭ اكىمى بولعان قۋانىشبەك ىسقاقوۆ سوت شەشىمىمەن ءۇي قاماۋىنا الىندى. بۇل تۋرالى قىزىلوردا وبلىستىق سوتىنىڭ ءباسپاسوز قىزمەتى حابارلادى.

ول اسا ءىرى كولەمدە الاياقتىق جاسادى دەگەن كۇدىككە ىلىنگەن (قىلمىستىق كودەكستىڭ 190-بابى، 4-بولىگىنىڭ 2-تارماعى). ىسقاقوۆتى قاماۋ تۋرالى سانكتسيانى تەرگەۋ سوتى 28 ناۋرىزدا شىعارعان.

"ساراپتاما ناتيجەسىندە كۇدىكتى قۋانىشبەك دوسمايلۇلى ىسقاقوۆقا قاتىستى "ۇيدە قاماۋدا ۇستاۋ" تۇرىندەگى بۇلتارتپاۋ شاراسىن قولدانۋ تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ ءوتىنىشى قاناعاتتاندىرىلدى.

بۇلتارتپاۋ شاراسىنىڭ مەرزىمى 2020 جىلدىڭ 26 ناۋرىزىنداعى 22:28-دەن باستاپ 2020 جىلدىڭ 26 مامىرىنداعى 22:28-گە دەيىن ەكى ايعا جالعاسادى", - دەلىنگەن رەسمي حابارلامادا.

بۇعان دەيىن ىسقاقوۆتىڭ ۇستالعانى تۋرالى قاۋەسەت WhatsApp جەلىسىندە تاراعان. وندا ىسقاقوۆپەن بىرگە ونىڭ تۋىسى جەڭىسبەك ىسقاقوۆتىڭ، كومەكشىسى ازات دوسمايلوۆتىڭ جانە ونىڭ ورىنباسارى بولعان مارات ءدىلمۇحانوۆتىڭ ەسىمدەرى اتالعان بولاتىن. وسىعان دەيىن بۇل اقپاراتقا قاتىستى وبلىس اكىمىنىڭ ءباسپاسوز قىزمەتىندەگىلەر ناقتى مالىمەت بەرە المايتىنىن، سەبەبى قاشىقتان جۇمىس ىستەۋ رەجيمىنە كوشكەنىن ايتقان ەدى.

اتالعان اقپاراتتا ىسقاقوۆتاردىڭ ارىس قالاسىن قالپىنا كەلتىرۋ جۇمىستارىنا ارنالعان "سىر مەيىرىمى" قوعامدىق-الەۋمەتتىك قورىنان 80 ميلليون تەڭگە العانى ايتىلعان.