ءبىزدىڭ ەلدە رەسمي اقپاراتتار الدىمەن ورىس تىلىندە شىعاتىن، ال مەملەكەتتىك تىلدەگى نۇسقاسى بىرنەشە ساعات، كەيدە بىرنەشە كۇن كەشىگىپ جاريالاناتىن ادەت بار. مۇندايدا قازاق ءتىلدى اقپارات قۇرالدارى امالسىز رەسمي حابارلاردى وزدەرى اۋدارادى. بىلايشا ايتقاندا، قازاق ءتىلدى باسىلىمدارداعى جۋرناليستەر اۋدارماشىلىق قىزمەتتى قاتار اتقارىپ كەلەدى.

وكىنىشكە وراي، قالىپتاسقان وسى جاعداي ەلدەگى توتەنشە جاعداي كەزىندە دە وڭالماي تۇر. جاۋاپتى ورگاندار ۆيرۋسپەن الىسىپ، قاربالاس بولىپ جۇرگەندە جۇمىستارىنان ءمىن ىزدەمەي-اق، قويۋعا بولار ەدى. بىراق ماسەلەنىڭ ءمانى ارىدە جاتىر. توتەنشە جاعداي كەزىندەگى جەدەل جاڭالىقتار نەگىزىنەن ورىس تىلىندە جاريالانىپ جاتقانى وكىنىشتى. مەملەكەتتىك تىلدە مالىمدەمە جوق دەمەيمىز، بار. بىراق تىم از جانە كەشىگىپ شىعادى.

نەگىزى قازاقستاندا سايت-پورتالداردىڭ كوبى شارتتى تۇردە قوس ءتىلدى دەپ كورسەتىلەدى. الايدا مەملەكەتتىك قۇرىلىمدار مەن اقپاراتتىق اگەنتتىكتەردىڭ ءوزى قازاقشا نۇسقاسىن ەلدىڭ كوزىن الداۋ ءۇشىن عانا اشىپ قويعانى جاسىرىن ەمەس. ماسەلەن، ۇلكەنى مينيسترلىكتىڭ، ودان كەيىن اكىمدىك، وزگە دە مەملەكەت قاراۋىنداعى باسقارمالاردىڭ سايتىندا ەڭ الدىمەن ورىسشا اقپارات جاريالانادى. ال قازاقشاسى شىقسا ءبىرتالاي ۋاقىت كەشىگىپ شىعادى، شىقپاسا ول دا جوق.

بۇل مەملەكەتكە قاراستى قۇرلىمدار جايلى اڭگىمە. ال كوممەرتسيالىق، ويىن-ساۋىق جانە جاڭالىق سايتتارى قازاق تىلىندە ەشتەڭە جاريالامايدى. كەز-كەلگەن وڭىردەگى مەملەكەتتىك ەمەس، بىراق حالىقپەن تىعىز جۇمىس جاسايتىن ورتالىقتار تەك ورىس تىلىندە قىزمەت كورسەتىپ كەلەدى. ءتىپتى مەملەكەت بيۋدجەتىنەن كۇن كورىپ وتىرعان سپورت كلۋبتارىنىڭ دا رەسمي سايتتارى مەملەكەتتىك تىلدە مۇلدە جاڭالىق تاراتپايدى.

مۇنىڭ ءبارى بەيبىت كۇندەگى جاعداي. بيلىكتىڭ جالتاقويلىعى، حالىقتىڭ بەيعامدىعىمەن بۇل ماسەلەلەر جابۋلى قازان - جابۋلى كۇيىندە كەلە جاتىر.

ال توتەنشە جاعدايداعى اڭگىمە بولەك. توتەنشە جاعداي كەزىندە اقپارات تاراتۋدا دا توتەنشە رەجيم بولۋ كەرەك. بۇرىنعىداي رەسمي مالىمدەمەنى الدىمەن ورىس تىلىندە بەرىپ، بەس ساعاتتان كەيىن مەملەكەتتىك تىلدە جاريالاۋ ۇلكەن قاتەلىككە ۇرىندىرادى. قازاقشاسى شىققانشا ورىسشا اقپاراتتى اركىم ءارتۇرلى اۋدارادى. ءارتۇرلى اۋدارما ءاۋ باستاعى اقپاراتتىڭ تونىن تەرىس اينالدىرىپ جىبەرۋى مۇمكىن. سودان بارىپ الەۋمەتتىك جەلىدەگى جالعان اقپاراتتار قالىپتاسادى.

ءىىم ازاماتتاردى الەۋمەتتىك جەلىدە جالعان اقپارات تاراتپاۋعا شاقىرۋدا. ەگەر ادەيى جالعان حابار تاراتاتىن بولسا 7 جىلعا دەيىن باس بوستاندىعىنان ايىرۋ جازاسى كوزدەلگەنىن ەسكەرتتى.

جالعان اقپاراتتىڭ الدىن العان دۇرىس. بىراق الدىن الۋدىڭ جالعىز جولى ازاماتتاردىڭ اۋىزىمەن الىسۋ ەمەس. ەكى ەلى اۋىزعا ءتورت ەلى قاقپاق قويۋدىڭ قيىن ەكەنى ءاۋ باستان بەلگىلى. سول ءۇشىن ءىستىڭ سالدارىمەن ەمەس، سەبەبىمەن كۇرەسكەن ءجون. مەملەكەتتىك ورگاندار مينۋت سايىن مەملەكەتتىك تىلدە اقپارات تاراتۋى كەرەك. رەسمي مالىمدەمەلەر حالىققا ەش كەشىكپەي جەتىپ تۇرسا، وتىرىك اقپارات وقۋعا ۋاقىت تا تابىلماس ەدى عوي...

توتەنشە جاعداي باستالعالى جەدەل اقپاراتتار جاۋاپتى ورگانداردىڭ رەسمي سايتىندا، الەۋمەتتىك جەلىدەگى پاراقشالارىندا جاريالانىپ جاتىر. اسىرەسە تەلەگرام جەلىسى بەلسەندى جۇمىس ىستەۋدە. شەندىلەردىڭ ءوزى اقپارات ىزدەگەندەردى سول جاققا سىلتەيدى. ەندى بىرنەشە رەسمي ورگاننىڭ جۇمىستى قاي تىلدە جۇرگىزىپ جاتقانىنا نازار اۋدارايىق.

قر دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ ۇلتتىق ورتالىعى. سايتىندا جاريالانعان سيرەك اقپاراتتار قوس تىلدە بەرىلىپ وتىرعان. ال تەلەگرام پاراقشاسى ورىس تىلىندەگى اقپارات باسىم. اسىرەسە توتەنشە جاعدايدىڭ العاشقى ون كۇنىندە مەملەكەتتىك تىلدە وتە از اقپارات جاريالاعان. تەك سوعى ەكى-ءۇش كۇندە قازاق ءتىلدى اقپاراتتار بار.

قازاقستانداعى كوروناۆيرۋسپەن كۇرەس جونىندەگى IT-شتاب. مەملەكەتتىك ءتىلدى بەلدەن باسىپ وتىرعان ورتالىق وسى ەكەن. سايتى قوس ءتىلدى بولعانىمەن، ورىس تىلىندە كوبىرەك اقپارات تاراتىپ وتىر. ال تەلەگرام پاراقشاسى ارا-تۇرا مەملەكەتتىك تىلدە اقپارات سالادى دەمەسەڭىز، كوبىنە ورىس تىلىندە جۇمىس ىستەپ تۇر.

وپەراتيۆتى شتابتىڭ سايتى قوس تىلدە جۇمىس ىستەپ تۇر. ال تەلەگرام پاراقشاسى سوڭعى كۇندەرى مەملەكەتتىك تىلگە ءمان بەرە باستادى. وعان دەيىن ورىس تىلىنە باسىمدىلىق بەرىپ كەلگەن.

ايتا كەتەرلىگى، جوعاردا اتالعان تەلەگرام پاراقشالارىنا ورتاق ەرەكشەلىك، توتەنشە جاعدايدىڭ باستاپقى كەزىمەن سالىستىرعاندا سوڭعى ۋاقىتتا مەملەكەتتىك تىلدە حابار تاراتۋعا ءمان بەرە باستاعان. سوعان قاراعاندا پايدالانۋشىلار شاعىم تۇسىرگەن بولۋ كەرەك.

كوروناۆيرۋس كەزىندە سالماقتىڭ اۋىرى دەنساۋلىق ساقتاۋ مينيسترلىگىنە ءتۇسىپ تۇر. اتالعان مينيسترلىك مۇمكىندىگىنشە جۇمىس ىستەپ جاتىر. مەملەكەتتىك تىلدە اقپارات تاراتۋى دا كوڭىل كونشىتەرلىك. الايدا قازاق ءتىلدى اقپاراتتا قاتەلىكتەر ءورىپ ءجۇر. بۇل دا ءبىزدىڭ مەملەكەتتىك ورگانداردىڭ كونە دەرتى. جوعارىدا مەملەكەتتىك تىلدە اقپاراتتار كەشىگىپ شىعادى دەدىك. سول كەشىگىپ شىققان قازاق تىلىندەگى جازبانى ءتۇسىنۋدىڭ ءوزى مۇڭ، مۇلدە تۇسىنىكسىز تىلدە جازادى. مەملەكەتتىك تىلدەگى زاڭ تارماقتارى، سوت قاۋلىلارى دا سولاي، تۇسىنىكسىز...

دەنساۋلىق ساقتاۋ مينيسترلىگىنىڭ Facebook پاراقشاسىندا بۇگىن تاڭەرتەڭ جاريالانعان مىنا اقپارات قوس تىلدە بەرىلگەن. بىراق قازاقشاسىندا قاتەلەر بار.

مەملەكەتتىك ءتىلدىڭ مارتەبەسىن مويىندامايتىن مۇنداي مىسالداردى مىڭداپ كەلتىرۋگە بولادى. بەيبىت كۇندەردە دە، توتەنشە جاعداي كەزىندە دە مەملەكەتتىك تىلدە ساۋاتتى جازىلعان تۇسىنىكتى كونتەنت تابۋ قيىننىڭ قيىنى. ءبىزدى تاڭعالدىراتىنى مەملەكەتتىك مەكەمەلەردە قازاق ءتىلىن جەتىك بىلەتىن بىردە-ءبىر مامان جوق پا؟ الدە قازاق بيلىگىنە قازاق ءتىلىنىڭ قۇنى كوك تيىن با؟!

قۇرمەتتى شەندىلەر، ەلدەگى قازاق ۇلتىنىڭ سانى 70 پايىزدان اسقاننىن، مەملەكەتتىك تىلگە سۇرانىستىڭ وتە جوعارى ەكەنىنە اقىلدارىڭىز جەتپەسە، مەملەكەت قۇراۋشى ۇلتتىڭ مۇددەسىن بەلدە باسا وتىرىپ، وزدەرىڭ ويدان شىعارىپ العان 50/50 قاعيداسىن ۇستانساڭىزدارشى تىم قۇرىعاندا...

قۋانىش قاپپاس

Abai.kz