ويتكەنى ءبىز ۇيدەن شىعا المايتىن مۇگەدەك جانداردى ۇمىتتىق. ولارعا ايتەۋىر جاردەماقى تولەنسە بولدى دەپ ولارعا نازار اۋدارىپ، ولاردىڭ كوڭىلدەرىنە قاراۋدى قويدىق.

ويتكەنى ءبىز جەتىم-جەسىرلەردى ۇمىتتىق. ولاردىڭ جەيتىن نانى مەن تۇراتىن باسپاناسى بار ما جوق پا، وعان باس اۋىرتپايتىن بولدىق.

ويتكەنى ءبىز اتا-انا مەن تۋعان-تۋىستى ۇمىتتىق. ولارمەن حابارلاسىپ، قال-جاعدايىن سۇراسۋدى، ولارعا كەرەك بولسا، كومەكتەسۋدى ۇمىتتىق.

ويتكەنى ءبىز دەنساۋلىعى دىمكاس ادامداردى ۇمىتتىق. قارجىلاي كومەك سۇراسا، وندايلار كوپ قوي، قايسىبىرىنە كومەكتەسە بەرەمىز دەيتىن بولدىق.

ويتكەنى ءبىز تازالىقتى ۇمىتتىق. كورىنگەن جەرگە تۇكىرىپ، تەمەكى مەن قوقىستى لاقتىرىپ كەتەتىن بولدىق.

ويتكەنى ءبىز مەيىرىمدى ۇمىتتىق. كوشەدە ادام قۇلاپ جاتسا، ماس شىعار دەپ وتە شىعاتىن بولدىق.

ويتكەنى ءبىز ادىلەتسىز بولدىق. باستىق ەكەنمىن دەپ ادامداردى جۇمىستان سەبەپسىز قۋاتىن بولدىق.

ويتكەنى ءبىز قاتىگەز بولدىق. جازىقسىز ادامدى سوتتاسا دا وعان سەلت ەتپەيتىن بولدىق

ويتكەنى ءبىز نەمقۇرايلى بولدىق. بالا زورلاعان پەدوفيلدەر تۇرمەگە وتىرىپ شىعىپ، قايتادان سول ءىسىن جالعاستىرسا سەلت ەتپەيتىن بولدىق.

ويتكەنى ءبىز بىلىمنەن قاشاتىن بولدىق. كىتاپ وقىمايتىن، رۋحاني دۇنيەگە ءمان بەرمەيتىن بولدىق.

ويتكەنى ءبىز اتاققۇمار بولدىق. اتاق الماعان، وردەن-مەدال تاقپاعان ادام تابا المايتىن بولدىق.

ويتكەنى ءبىز وتىرىك عالىم بولدىق. بىراق تەحنولوگياسى جوق دامىماعان مەشەۋ ەل بولدىق.

ويتكەنى ءبىز ەلىمىزدى دارىپتەۋدى ۇمىتتىق. شەتەل انداي، باتىس مۇنداي دەپ تامساناتىن بولدىق.

ويتكەنى ءبىز سالت-ءداستۇردى ۇمىتتىق. ءتىپتى وعان جيىركەنە قارايتىن ۇرپاق تاربيەلەيتىن بولدىق.

ويتكەنى ءبىز سابىردى ۇمىتتىق. اشۋشاڭ بولىپ ۇرىس-كەرىسكە تەز كىرىگىسەتىن بولدىق.

ويتكەنى ءبىز جالاقور جانە وسەكشى بولدىق. بىرەۋ تۋرالى جامان ءسوز ەستىسەك، ول ادامدى جەر-جەبىرىنە جەتىپ "جەرلەپ" تاستايتىن بولدىق.

ويتكەنى ءبىز قاناعاتتى ۇمىتتىق. ارتىق تاماق پەن دۇنيەگە قىزىعاتىن بولدىق.

ويتكەنى ءبىز ىسىراپشىل بولدىق. قاتقان ناندى قوقىسقا لاقتىرا سالاتىن بولدىق.

ويتكەنى ءبىز تىيىمدى ۇمىتتىق. ەتەگى اشىلعان قىز بەن ءتارتىپسىز ۇلعا ءسوز ايتا المايتىن بولدىق.

ويتكەنى ءبىز كورسەقىزار بولدىق. قاجەتى شامالى بولسا دا ۋداي قىمبات سمارتفون ۇستايتىن بولدىق.

ويتكەنى ءبىز اڭقاۋ ەلگە ارام مولدا بولدىق. ترەنينگ وتكىزىپ، لوتەرەيا ويناتقىش بولدىق.

ويتكەنى ءبىز شىرىلداۋىق شەگىرتكە بولدىق. انشىسىماق بولىپ، تەرىس ونەگە كورسەتەتىن بولدىق.

ويتكەنى ءبىز جالقاۋ بولدىق. ءانشى، پروكۋرور، سوت نەمەسە اكىم بولىپ، قالاي تەز وڭاي اقشا تاپساق دەيتىن بولدىق.

ويتكەنى ءبىز قۇدايدى ۇمىتتىق. اۋزىمىزدا قۇداي بولعانمەن، ول جوق سياقتى ءومىر سۇرەتىن بولدىق.

پىسى. نەگە دەپ ويلانساڭىز، ءسىز دە تالاي نارسەنى ءتىزىپ شىعاسىز.

سەرىكقازى كوكەنايدىڭ الەۋمەتتىك جەلىدەگى جازباسى

Abai.kz