الەمنىڭ 200-دەن اسا مەملەكەتىنە تاراعان كوروناۆيرۋستى دۇنيەجۇزىندە 1,5 ميلليوننان اسا ادام جۇقتىرعان. 88 مىڭنان كوپ ادام وسى ىندەتتەن كوز جۇمدى. بۇل كەسەل ءبىزدىڭ ەلگە دە جەتتى، بىلەسىزدەر. كوروناۆيرۋس بەلگىلەرى انىقتالعان 750-دەن اسا ناۋقاس تىركەلدى. 7 ادام قايتىس بولدى.

بىزدە، ءبىز تۇگىلى الەمدە دارىگەرلەر قاۋىپتى ىندەت اۋەلى قارت كىسىلەرگە، سوسىن بالا-شاعاعا تەز جۇعاتىنىن ايتىپ دابىل قاعۋدا. بۇل كوپتىڭ بىلەتىن اقپارى. ال قاۋىپتى ۆيرۋستىڭ بۇدان باسقا قانداي بەلگىلەرى بار؟ ۆيرۋس تاعى كىمدەرگە تەز جۇعادى؟ ىندەتتىڭ بەتىن قايتارۋى ءۇشىن نە ىستەۋ كەرەك؟ مىسالى، ماماندار كوروناۆيرۋس ينفەكتسياسى جۇرەك پروبلەمالارىن ناشارلاتۋى مۇمكىن دەيدى. ال سول قاۋىپتى قالاي ازايتۋعا بولادى؟ بۇل سۇراققا الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتى ماماندارى جاۋاپ بەرەدى.

COVID-19-عا شالدىققان پاتسيەنتتەردىڭ 25%-دان 50%-عا دەيىن جاناما اۋرۋلارى بار. بۇل بولجامدى ستاتيستيكا. جۇرەك-قان تامىرلارى اۋرۋلارى، قاتەرلى ىسىك، سوزىلمالى رەسپيراتورلىق اۋرۋلار جانە قانت ديابەتى سياقتى پاتولوگيالارى بار كوموربيدتى ناۋقاستار ءۇشىن قولايسىز ناتيجەلەر قاۋپى حالىقتىڭ ورتاشا دەڭگەيىنە قاراعاندا ەداۋىر جوعارى.

كارديولوگيا جانە ىشكى اۋرۋلار عىلىمي-زەرتتەۋ ينستيتۋتى كارديولوگيا كافەدراسىنىڭ دوتسەنتى، م.ع.ك. كۇلزيدا قوشۋمباەۆا پوپۋلياتسيادا ءجيى كەزدەسەتىن جۇرەك-قان تامىرلارى اۋرۋلارى بار ناۋقاستار ەرەكشە قاۋىپ توبىن قۇرايدى، دەيدى.

كۇلزيدا قوشۋمباەۆا، م.ع.ك.، كارديولوگيا جانە ىشكى اۋرۋلار عزي، كارديولوگيا كافەدراسىنىڭ دوتسەنتى:

- جۇرەگى اۋىراتىندار ناۋقاستاردىڭ قاتارىنا قوسىلماۋ ءۇشىن قاراپايىم ساقتىق شارالارى مەن دارىگەردىڭ ايتقاندارىن ورىنداۋى كەرەك. بۇل دەگەنىڭىز - مەملەكەتتىك جانە جەرگىلىكتى اتقارۋشى ورگاندار، مەديتسينا قىزمەتكەرلەرى تاراپىنان قابىلدانعان كارانتين تالاپتارىنىڭ ساقتاۋ دەگەن ءسوز. ياعني ادامدارمەن قارىم-قاتىناستى شەكتەۋ، ۇيدە بولۋ، ادامدار كوپ جينالاتىن ورىندارعا شىقپاۋ، ءارتۇرلى كولىكپەن جۇرمەۋ، نەمەرەلەردىڭ اتا-اجەلەرىمەن بايلانىسىن ۋاقىتشا شەكتەۋ ت.ب. ويتكەنى بالالار اسيمپتوماتيكالىق ۆيرۋس تاسىمالداۋشىلارى بولۋى مۇمكىن. 

كارديولوگيا جانە ىشكى اۋرۋلار عزي:

- قوعامدىق ورىندارعا امالسىز بارعان كەزدە، باسقا ادامدارعا قاتىستى (1-1,5 مەتردەن استام) قاۋىپسىز قاشىقتىقتى ساقتاۋ كەرەك. مەديتسينالىق ماسكا كيىپ، قول الىسۋدان باس تارتىپ، بەتىڭىزگە، كوزىڭىزگە، مۇرنىڭىزعا جانە اۋزىڭىزعا قولىڭىزدى تيگىزبەڭىز، قولىڭىزدى مۇمكىندىگىنشە ءجيى جۋىپ، سابىن جانە قۇرامىندا سپيرت بار دەزينفەكتسيالىق سۇيىقتىقتى قولدانىڭىز. دارىگەرلەردىڭ بارلىق ۇسىنىستارىن قاتاڭ ساقتاپ، تاعايىندالعان ءدارى-دارمەكتەردى قابىلداۋدى جالعاستىرۋ قاجەت. پاندەميا ۋاقىتشا ەكەنىن سەزىنىپ، ۇرەيگە بوي الدىرماي، اقىل-پاراساتىڭىزدى ساقتاڭىز.

كوروناۆيرۋس ينفەكتسياسىنا شالدىققان جۇرەك-قان تامىرلارى اۋرۋلارى بار پاتسيەنتتەردىڭ 90%-ى ساۋىعىپ كەتكەنىن ايتا كەتۋ كەرەك.

ىستىق ۆاننالار مەن مونشالار COVID-19-دان قورعامايدى، كەرىسىنشە جۇرەك-قان تامىرلارى اۋرۋلارى بار ناۋقاستار ءۇشىن قاۋىپتى بولۋى مۇمكىن. بۇل پىكىردى  كوروناۆيرۋس ينفەكتسياسىن الكوگولمەن «ەمدەۋ» ارەكەتىنە دە قاتىستى ايتۋعا بولادى.

Abai.kz