بۇگىنگى كۇنى ىندەتپەن كۇرەستىڭ الدىڭعى شەبىندە دارىگەرلەر ءجۇر. ولارعا قولداۋ ءبىلدىرۋىمىز ءتيىس.

سالىستىرىپ كورىڭىزشى: پارلامەنت دەپۋتاتتارى تۇك بىتىرمەي-اق، ميتينگى تۋرالى، جەرگە قاتىستى حالىققا قارسى زاڭداردى ماقۇلداپ وتىرىپ، ايىنا 1 ميلليون تەڭگەدەن ايلىق الادى. وعان قوسا، قىزمەتتىك كولىگى، ءۇيى، ءىسساپار شىعىندارى، پرەميالارى بار. قازىر 65-تەن اسقان دەپۋتاتتار ءتىپتى ۇيىندە جاتىر. سوندا دا ميلليونداپ ايلىق الادى. جىل سايىن پارلامەنتتىڭ شىعىنىنا 10 ميللياردتان استام اقشا بولىنەدى ەكەن.

ال دارىگەرلەرگە قاراڭىز. 120 دارىگەر قازىردىڭ وزىندە كوروناۆيرۋس ىندەتىن جۇقتىرعان. جۇزدەگەن اۋرۋعا شالدىققان ناۋقاستارمەن كۇندىز-ءتۇنى جۇمىس ىستەۋدە، ەم-دومىن جاساۋدا. قورعانىس زاتتارى دايىن ەمەس، قولدارىنان ماسكا تىگىپ، قوقىس پاكەتتەرىنەن كوستيۋم دايىنداۋدا. اپتالاپ ۇيلەرىنىڭ بەتىن كورگەن جوق. سوندا ولاردىڭ الاتىنى 3-اق اي كوبەيتىلگەن قاراجات.

جىل سايىن مەديتسينا سالاسىنا ميلليردتاعان دوللار بولىنەدى. بيىلدىڭ وزىندە 1 تريلليون تەڭگەدەن استام اقشا قاراستىرىلعان. بيۋدجەتتەگى ەڭ ۇلكەن بولىك ءدال وسى مەديتسينا سالاسىنا كوزدەلەدى. سوندا ول اقشا نەگە مەديتسينا قىزمەتكەرلەرىنە بەرىلمەيدى؟ وسىنشاما قارجى جىل سايىن قايدا كەتۋدە؟ كىمنىڭ قالتاسىنا تۇسەدى؟ 100 اۋرۋحانا سالامىز دەگەن باعدارلاما قايدا قالدى؟ اۋرۋ اسقىنعان تۇستا ەدەل-جەدەل ءۇش قالادان 3 اۋرۋحانا سالامىز دەپ وتىر. ونى نەگە بۇرىننان سالماعان؟

باتىس ەلدەرىنە الىپ قاراڭىز. ۇستازدار، پروفەسسورلار مەن دارىگەرلەر ەڭ سىيلى ماماندىق يەلەرى. ول جاقتا «كەدەي مۇعالىممىن» نەمەسە «كەدەي دارىگەرمىن» دەيتىن ماماندىق يەسى جوق. قازاققا تۇك پايداسى جوق بيلىكتىڭ قالاۋلىلارىنا اينالعان دەپۋتاتتارعا ميلليونداپ قارجى تولەگەنشە، دارىگەرلەر مەن ۇستازداردى قولدايىق.

بۇگىنگىدەي قيىن-قىستاۋ زاماندا كورىپ وتىرمىز، بىزگە قاجەتى «ءتورت اياقتى» جانە ۇيقىلى-وياۋ دەپۋتاتتار ەمەس، دارىگەرلەر!

جانبولات مامايدىڭ الەۋمەتتىك جەلىدەگى جازباسى

Abai.kz