ادال مەن ارام
وتكەندە ءبىر تانىسىم حابارلاستى. اكەسىنە وپەراتسيا جاساۋ كەرەك ەكەن، دارىگەرگە بارىپ جولىقسا -"انەستەزيولوگقا بىردەڭە بەر، ايتپەسە ناۋقاس ۇيقىسىنان تۇرماي قالادى" دەپتى. بارىپ، اناعان 10 مىڭ بەرسە، تاعى 20 مىڭ قوسۋىن سۇرايدى دەيدى.
اقشا تاپقان دۇرىس شىعار. بىراق، ءولىم مەن ءومىر اراسىندا تۇرعان بەيشارادان وسىلاي بوپسالاۋ ادال اقشا بولا ما؟
رەداكتسياعا ءبىر كىسى كەلدى. بالاسى ءىستى بولعان ەكەن. شىرىلداعان اكەدەن ادۆوكاتى اقشا سۇراپتى. ءىس دۇرىس شەشىلۋى ءۇشىن سوتقا تاعى باسقالارعا بەرەمىن دەيدى ەكەن.
تاعى دا اقشا بوپسالاۋ. بىراق، قينالعاننان كۇرەپ الۋ ادال بولا ما؟
باياعىدا اكەمىز " بۇلىنگەننەن بۇلدىرگى الما" دەپ ايتىپ وتىراتىن ەدى.
ەستىگەن اڭگىمەم: بالالاردى تاماقتاندىرۋ كونكۋرسىن جەڭىپ الۋ ءۇشىن جوعارىعا قىرعىن اقشا بەرۋ كەرەك ەكەن. سوسىن ول اقشانى مەكتەپ اسحاناسى ارقىلى، ياعني بالالارعا ساپاسىز، ارزان (سروگى وتكەن ت ب) اس بەرۋ ارقىلى قايتارىپ الادى-مىس.
تاعى دا سول اقشا تابۋ. بىراق، بالانىڭ دەنساۋلىعىنا زيان كەلتىرىپ تاپقان تابىس ادال بولا ما؟
بۇگىندە ءومىردىڭ ءمانى اقا تابۋ بولدى. دۇرىس شىعار. بىراق اقشانىڭ دا ارامى مەن ادالى بولاتىنىن ۇمىتپاۋ كەرەك قوي.
قازىر قايتا ارام اقشا تاپقانىن ماقتانىپ ايتاتىن بولدى جۇرت.
وسىدان 2 جىل بۇرىن بازارداعى ساتۋشى تارازىدان قالاي جەپ قالاتىنىن مايىن تامىزىپ ايتىپ بەرگەن. ەڭ باستىسى ونى ماقتانىپ تۇرىپ ايتتى. ادامداردىڭ كوبى لوح قوي، مەن سياقتى اقىلدىلارعا جەم بولىپ جۇرەدى سولاي دەپ.
كۇنى كەشە بىرەۋ ءجۇر، تاماققا جارىماي وتىرعان وتباسىنا 42500 اپەرۋگە كومەكتەستىم دە 10 مىڭىن الىپ الدىم دەيدى.
سوندا ءبىزدىڭ قوعام ادال مەن ارامنىڭ اراجىگىن اجىراتۋدان قالعان با؟
جاناحمەت اعىبايدىڭ الەۋمەتتىك جەلىدەگى جازباسى
Abai.kz
