الەۋمەتتىك كومەك الۋعا ءوتىنىش بەرۋ كەزىندە قاتەلىكتەرگە جول بەرگەن ازاماتتاردىڭ ەشقايسىسى قىلمىستىق جاۋاپكەرشىلىككە تارتىلمايدى. بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ورتالىق كوممۋنيكاتسيالار قىزمەتىندەگى بريفينگتە مالىمدەدى. 

ءمينيستردىڭ ايتۋىنشا، قازىرگى كەزدە 3 690 مىڭ ادامعا جالپى سوماسى 157 ملرد.تەڭگەگە 42 500 تەڭگە كولەمىندە الەۋمەتتىك كومەك تاعايىندالعان.

- «وكىنىشكە وراي، سوڭعى كۇندەرى الەۋمەتتىك جەلىلەردە، قوعامدا «42 500 تەڭگە العانى ءۇشىن قىلمىستىق تۇرعىدا جازالايدى ەكەن« دەگەن اڭگىمە كوپ تارالدى. ءبىز ءبارىن قاراپ شىقتىق. 5 ساۋىردەن باستاپ زاڭگەرلەرىمىز وسى ماسەلەگە قاتىستى پىكىرلەرىن ايتا باستاعان. ونىڭ ىشىندە ەرەكشە تارالعانى سول كۇنى زاكون.كز پورتالىندا ورىس تىلىندە دانيار نۇرلانۇلى مەن رۋسلان قوجاحمەت ەسىمدى زاڭگەر-ادۆوكاتتاردىڭ قىلمىستىق كودەكستىڭ الاياقتىققا قاتىستى باپتارىن تالداپ، سونى 42 500 تەڭگە تولەمىنە قاتىستىرىپ جازعان ماقالاسى بولدى», - دەدى ول.

اتالعان ماقالادا ول ازاماتتار «مينيستر نۇرىمبەتوۆتىڭ ەشكىمدى جاپپاي تەكسەرمەيمىز دەگەن ءسوزىن جۇمىس بەرۋشىلەر پايدالانىپ، جالعان مالىمەتتەر بەرۋى مۇمكىن» دەگەنگە كەلتىرگەن.

«وسىعان بايلانىستى، قۇرمەتتى قازاقستاندىقتار، اعايىندار! بىردە-ءبىر ادام 42 500 تەڭگە العانى ءۇشىن، ءتىپتى جىبەرگەن قاتەلىگى ءۇشىن قىلمىستىق جازاعا تارتىلمايدى. وعان نەگىز جوق. وسىعان نۇكتە قويايىق. ەشكىم جاۋاپكەرشىلىككە تارتىلمايدى. ونى انا تالقىلاپ جاتقان زاڭگەرلەر دە بىلەدى. ءبىز ەشكىمدى تەكسەرمەيمىز. سەبەبى بۇل - الەۋمەتتىك تولەم. بۇل - الەۋمەتكە باعىتتالعان تولەم»,- دەدى مينيستر.

ءبىرجان نۇرىمبەتوۆ حالىقتىڭ باسىم بولىگىنىڭ تابىسى از، جالاقى مولشەرى تومەن، زەينەتاقى، جاردەماقى كوپ ەمەس ەكەندىگىن باسا ايتتى.

«سوندىقتان كوپشىلىك وسى تولەمدى العىسى كەلەدى. وتكەن بريفينگىدە دە ايتقانمىن، ءبىز ەشكىمدى جاپپاي تەكسەرىپ جاتپايمىز. جەكە تۇلعالاردى، رەسمي نە بەيرەسمي بولسىن جۇمىس ىستەپ جۇرگەندەردى ۇيلەردى ارالاپ، تەكسەرمەيمىز. ەشتەڭەگە ۋايىمداماڭىزدار. سىزەرگە تولەندى مە؟ الىڭىزدار، جاراتىڭىزدار. تەكسەرۋ بولسا دا ءبىزدى تەكسەرەدى»،- دەدى ەڭبەك مينيستر.

سونداي-اق، مينيستر جەكە تۇلعالارعا الەۋمەتتىك تولەمدى قايتارۋدىڭ قاجەتى جوعان اتاپ ءوتتى.

«42 500 تەڭگە الەۋمەتتىك تولەمى پرواكتيۆتى تۇردە تاعايىندالعاندار ەش نارسەنى ۋايىمداماۋ كەرەك. ونى قايتارۋدىڭ دا قاجەتى جوق. بۇكىل جەكە تۇلعالار، ەشقايسىڭىز قايتارماڭىزدار، ۋايىمداماڭىزدار. تەكسەرۋ دە بولمايدى. تەكسەرۋ بولعان كۇننىڭ وزىندە ەشكىم سىزدەردىڭ جۇمىسىڭىزدىڭ بولعانىن نە بولماعانىن دالەلدەي المايدى. سوندىقتان ونى قايتارۋدىڭ قاجەتى جوق»، - دەدى مينيستر.

Abai.kz